Qaz jáne kz domendik ataýlardy qoldaýda básekelestik talaptary buzylǵan - mınıstr
«2017 jyly aıaqtalǵan tergep-tekserýler sany 212 isti qurasa, onyń 187-sinde básekelestikti qorǵaý salasyndaǵy buzýshylyqtar anyqtaldy. Básekelestikti qorǵaý salasyndaǵy zańnamany buzýshylyqtardyń tekserilgen isteriniń qurylymynda memlekettik jáne jergilikti atqarýshy organdardyń básekelestikke qarsy áreketteri basym»,- dedi ol.
Mınıstrdiń dereginshe, ekinshi orynda básekelestikke qarsy kelisilgen áreketter, úshinshi orynda ústem jaǵdaıdy teris paıdalaný, tórtinshi orynda josyqsyz básekelestik, al besinshi orynda básekelestikke qarsy kelisimder bóligindegi buzýshylyqtar tur.
«2017 jyly barlyǵy 2,08 mlrd teńge somasyna aıyppul salynyp, onyń 593,6 mln teńgesi óndirip alyndy. Qalǵany ákimshilik ister sottarda qaralyp jatyr. Sondaı-aq, 2017 jyly 2016 jylǵy tergep-tekserýler qorytyndysy boıynsha 1,33 mlrd teńge aıyppul bıýdjet kirisine óndirildi», - dedi Tımýr Súleımenov.
Onyń aıtýynsha, 2017 jyly júrgizilgen tergep-tekserýler nátıjesinde dárilik zattar men medıtsınalyq maqsattaǵy buıymdardy saqtaý jáne tasymaldaý qyzmetteri naryǵynda kartel dáleldendi. Memleket kirisine shamamen 500 mln teńge óndirip alyndy. «Qaz» jáne «kz» domendik aımaqtardaǵy domendik ataýlardy tirkeý jáne qoldaý qyzmetteri naryǵynda baǵalardy belgileý jáne qoldaý bóliginde básekelestikke qarsy kelisimder anyqtaldy. Tergep-tekserilgen nysandardan 4,6 mln teńgeden astam aıyppul óndirildi. Janar-jaǵarmaıdy bólshek saýdada ótkizý naryǵynda 47 JJM naryq sýbektisine qatysty baǵalardy ósirý boıynsha kelisilgen is-áreketter faktisi anyqtaldy jáne monopolııalyq tabysty esepke ala otyryp 960 mln teńge somasynda aıyppul salyndy.
«Qazirgi kezde básekelestikti qorǵaý salasyndaǵy zańnamanyń buzý faktisi boıynsha 81 nysanǵa tergep-tekserý júrgizilip jatyr. Olar: kómirdiń bastapqy jáne qaıtalama kóterme jáne bólshek saýda naryqtary, janar-jaǵarmaıdyń bólshek saýdada ótkizý naryǵy», - dedi mınıstr.