Qaıyrymdylyq jasaýdan adam rýhanı lázzat alady - Qoǵamdyq qor quryltaıshysy
Bul týraly Ortalyq kommýnıkatsııalar qyzmetinde ótken onlaın brıfıngte «ShUǴYLA» qoǵamdyq qorynyń quryltaıshysy Meırhan Abdrahmanov aıtty, dep habarlaıdy QazAqparat tilshisi.
«Biz belgili bir áleýmettik toptaǵy adamdarǵa kómektesemiz, olar: kópbalaly otbasylar, tolyq emes otbasylar jáne múgedek bala tárbıelep otyrǵan otbasylar. Olarǵa áleýmettik jaǵynan, medıtsınalyq turǵyda kómek kórsetemiz. Sondaı-aq, qaıyrymdylyqqa qatysty birneshe jobamyz bar. Sonyń biri – «Bereke» jobasy. Bul joba aıasynda biz azyq-túlik satyp alyp, qoraptarǵa salyp, ákimdikten muqtaj otbasylardyń tizimin alyp, taratamyz. Azyq-túlik taratýshylar ómirde qandaı jaǵdaı bolýy múmkin ekenin kózben kóredi. Qaıyrymdylyq jasaý barysynda adam rýhanı lázzat alady», - deıdi «ShUǴYLA» qoǵamdyq qorynyń quryltaıshysy Meırhan Abdrahmanov.
Onyń aıtýynsha, ol qolǵa alǵan ekinshi joba «Jylý syıla» dep atalady.
«Bul joba arasynda kómirge muqtaj otbasylarǵa kómir taratamyz. 5 jyl ishinde Almaty oblysynda 3 mln 600 myń tonna kómir tarattyq. Úshinshi jobamyz otbasynyń otbasyǵa kómektesýine negizdelgen. Jaǵdaıy jaqsy otbasylarda kóp kıim artylyp qalady. Sol kıim-keshekti qordyń dúkenine ótkizedi. Al muqtaj adamdar sol dúkenge kelip, kıim ala alady. 3-4 jyl ishinde 96 tonnadaı kıim-keshek tarattyq. Sondaı-aq, «Mektepke jol» dep atalatyn jobamyz bar. Sońǵy bes jylda oqýshylardy 36 mln teńgeniń oqý qural-jabdyǵymen qamtamasyz ettik. Sonymen qatar, áleýmettik jaǵdaıy tómen otbasylarǵa flıýrografııadan tegin ótýge, MRT-ǵa tegin túsýge kómektesemiz. Sal aýrýyna shaldyqqan balalarǵa tegin massaj jasatý jáne basqa da protsedýralaryna kómektesemiz. Áleýmettik salaǵa qatysty «Bilim joly» degen jobamyz bar. Bul joba aıasynda áleýmettik jaǵdaıy tómen otbasylardyń balalaryn UBT-ǵa daıyndaımyz jáne aǵylshyn tilin úıretemiz. Bıyl pandemııa kezinde halyqpen birge 450 mln teńge jınap, shilde-tamyz aılary aralyǵynda elimizdegi 380 medıtsınalyq uıymǵa 4000 ottegi kontsentratoryn tarattyq», - deıdi ol.