Qaıyrymdy jandar maqtaaraldyq oqýshylarǵa 110 planshetti syıǵa tartty

MAQTAARAL. QazAqparat - Túrkistan oblysy Maqtaaral aýdanynda «Bilim-Innovatsııa» lıtseıleriniń ata-analary men túlekteri 4 mıllıon 491 myń teńge kóleminde qarjy jınap, 110 planshetti oqýshylarǵa syıǵa tartty. Atalǵan shara «Biz birgemiz!» aktsııasy aıasynda jasalyp otyr, dep habarlaıdy QazAqparat tilshisi.

Elimizdegi epıdemııalyq ahýalǵa baılanysty búgingi tańda mektep oqýshylaryn qashyqtan oqytý mańyzdy. Degenmen, ol úshin kompıýterler men noýtbýktar, smartfondar men planshetter qajet.

«Bilim-Innovatsııa» lıtseıleri sý tasqynynan zardap shekken jáne az qamtylǵan otbasylardyń balalaryna planshet tabystady.

«Elimizde qandaı qıyn jaǵdaı bolmasyn, urpaǵymyzǵa sapaly bilim berýdi jalǵastyrýǵa tıispiz. Bul – memleketimizdiń bolashaǵy úshin óte ózekti. Sý tasqynynan zardap shekken maqtaaraldyq oqýshylardyń bilim alýyna jaǵdaı jasap, úlken kómek berip jatqan «Bilim-Innovatsııa» qory men lıtseılerine aýdan jurtshylyǵy atynan rızashylyǵymdy bildiremin!», – deıdi aýdan ákimi Baqyt Asanov.

Aıta keteıik, atalǵan qaıyrymdylyq sharasy «Bilim-Innovatsııa» qory men lıtseıleri júzege asyrǵan jalǵyz ıgilikti is emes.

Buǵan deıin qor 100 ottegi kontsentratyn elimizdiń barlyq aımaǵyndaǵy oblystyq aýrýhanalarǵa jetkizgen bolatyn.