Qaıyrymdy jandar 12 otbasyna baspana syılady - Túrkistan oblysy
Aýdan ákimi Qaırat Joldybaıdyń uıymdastyrýymen jergilikti kásipkerler men demeýshi azamattar kúnkórisi tómen kópbalaly otbasylarǵa jáne júrip-turýy qıyn múmkindigi shekteýli azamattardy baspana syılady.
Aýdan ákimdiginiń málimetinshe, aǵymdaǵy jyly atalǵan baǵdarlamamen turmysy tómen januıalarǵa 9 baspana berý josparlanǵan. Alaıda jany jomart jandar muqtaj azamattarǵa 12 baspana alyp berdi. Turǵyn úıge qol jetkizgenderdiń qatarynda kópbalaly jalǵyzbasty analar men múgedek jandar, áleýmettik jaǵynan az qamtylǵan otbasylar men kómekke zárý januıalar bar.
Máselen, 8 balanyń anasy Regına Súıeýova jyldar boıy Shymkent qalasynda páter jaldap turyp kelgenin aıtady. Tuńǵyshy 13 jasta bolsa, kenshesi áli jasyna da tolmaǵan. Ózi bala kútimimen úı sharýasynda júrgen kelinshektiń kúıeýi jaldanyp jumys isteıdi. Búginde júk kóligin aıdap, nápaqasyn taýyp júr. Qazir bul januıa Shardara qalasyna qarasty Óteǵul eldimekeninde turaqtaǵan.
«Osy ýaqytqa deıin jaldamaly páterden páterge aýysyp, shıtteı 8 balamen qatty qınaldyq. Kúıeýimniń bir ózi jumys istegendikten kún kórisimiz de máz emes edi. Shymkent qalasynda júrgen jerden demeýshiler taýyp, Shardara qalasynan baspana alýǵa qolǵabys etken aýdan ákimi Qaırat Joldybaıǵa alǵysym sheksiz»,- deıdi kópbalaly ana.
Aýdan ákimdiginiń ókilderi jyl sońyna deıin osy baǵdarlama aıasynda taǵy da 3 otbasyǵa turǵyn úı tabystaýǵa múmkindik týyp otyrǵanyn aıtady. Sonymen qatar, shalǵaı aýdanynda memleket tarapynan 4 qabatty ári 40 páterli 2 turǵyn úı kesheniniń qurylysy salynýda. Osylaısha jyl sońyna deıin turǵyn úı kezeginde turǵan 80 otbasy baspanaly bolady dep josparlanyp otyr.
Aıta keteıik, búgingi kúnge Shardara aýdanynda ataýly áleýmettik kómek alatyn 1713 otbasy bar. Onyń ishinde baspanasy joq turǵyn úıge muqtaj januıalar kezeń-kezeńimen baspanamen qamtamasyz etilmek.