Qaıyrymdy qoǵamǵa bastar jol

ASTANA. QazAqparat - Elbasy Nursultan Nazarbaev burynǵynyń jolyn, búginginiń jónin, bolashaqtyń baǵytyn aıqyndap bergen «Bolashaqqa baǵdar: rýhanı jańǵyrý» atty baǵdarlamalyq maqalasynda «alǵa basý úshin ulttyń damýyna kedergi bolatyn ótkenniń kertartpa tustarynan bas tartýdy» usynǵany málim. Munyń otbasy tárbıesine de tikeleı qatysy bar, dep habarlaıdy QazAqparat «Egemen Qazaqstan» gazetine silteme jasap.

Parlament depýtaty retinde ártúrli sharalarǵa qatysqanda, el aralaǵanda, sondaı-aq uzaq jyldardan beri «Qazaqstan ardagerleri» qaýymdastyǵy atynan áskerı patrıottyq tárbıe jumystaryn júrgizý barysynda bir jaıtqa kóz qanyǵyp, kóńil sendi. Ol jaıt - otbasynda balanyń meıirim men shýaqqa bólenýiniń qajettiligi. Bul balaǵa qýat beredi, kóńilin keńeıtedi, janyn jaısań etedi. Onyń ómirine nur shashyp, keleshekke aq jol, adal nıet nusqaıdy. Ómirde ana alaqanynyń qyzýy men ákeniń asyl tárbıesin eń jeńsik as ta, asta-tók baılyq ta, shıpasy kúshti dári de almastyra almaıdy. Otbasynda meıirim kórmegen bala rýhanı ustynnan ada bolyp ósýi, ózin ulttan saıaq ustap, ózge jandarǵa óshpendilikpen qaraýy yqtımal.
Mundaı azamattar ártúrli jat aǵymdar men ekstremıstik toptar úshin áleýetti kúshke, daıyn materıalǵa aınalyp ketýi ǵajap emes. Onyń ústine rýhsyzdyq, rýhanııatsyzdyq - kemel qoǵam úshin jat qubylys. Ol - bolashaǵy birtutas el qurý jolyndaǵy basty bir kedergi. Batyr ata-babalary óz ulty úshin arpalysqan, jurtyn aqsatýdy emes, asqaqtatýdy oılaǵan. Olardyń ulyq úlgisi ulttyq qundylyq retinde jas urpaq qulaǵyna quıylǵany abzal. Máńgilik el bolamyn degen memlekettiń ár turǵyny jylaǵandy jubatyp, jyǵylǵandy qoltyǵynan demeýge daıar turatyn elgezek, meıirimdi, kishipeıil, jylyjúzdi bolǵany abzal.
Qaıyrymdylyq kómek qorynyń málimetine sáıkes (CAF - Charity Aid Fondation) álemdik qaıyrymdylyq reıtınginde Qazaqstan 2017 jyly 139 el arasynda 87-shi oryn aldy. Bul reıtıngidegi ornymyzdyń jaqsarýy qoǵamnyń súringenge kómek qolyn sozyp, taryqqanǵa súıeý bolýyna da baılanysty.
Sebebi reıtıng tek qaıyrymdylyq uıymdaryna aýdarylatyn aqsha kólemimen ǵana emes, árbir el azamatynyń erikti-volonter retinde izgi isterge aralasýy, beıtanys muqtaj adamdarǵa kómek kórsetýi sekildi ólshemder boıynsha da baǵalanady. Esigine eshqashan qulyp salmaǵan, ár qonaqty qýana qarsy alǵan meımandos ári meıirban halqymyz otarlyq tusynda kórgen talaı qııanat pen qııamet, qýǵyn-súrginder men qyrǵyndar saldarynan bóten janǵa kúdikpen qaraýdy úırendi, boıynda beı-jaılyq, selqostyq sezimi bekidi. Endi munyń barlyǵy ótkenmen birge qalýy tıis.
Rýhanı jańǵyrý aıasynda biz ál-Farabı babamyz ańsaǵan «Qaıyrymdy qoǵamdy» qurýǵa tıispiz! Bul úshin Elbasynyń «Rýhanı jańǵyrý» strategııasynda aıtylǵan ulttyq ustyndy saqtaý; ozyq dástúrlerdi ustaný; kejegeni keri tartyp, aıaqtan shalatyn jaman ádetterden arylý; básekege qabilettilik; bilimpaz bolýǵa umtylý; sananyń ashyqtyǵy jáne basqa da qadir-qasıetterge jas urpaq balabaqshada úıretile bas taýy qajet dep sanaımyn. Sonda urpaq aýysyp, el jańaryp, Elbasynyń baǵdarlamalyq maqalasynda aıtylǵan ańsarly murattar iske asady. Búginde álem jurtshylyǵy aldynda adamzat úshin ómirlik mańyzdy úsh ózekti mindet tur: onyń birinshisi - rýhanııatty, ekinshisi - beıbitshilikti, úshinshisi - tabıǵatty saqtap qalý. Bulardyń qaı-qaısysy da bizdiń tir shi ligimizdiń basty baǵdary. Bir-birin tolyqtyratyn uǵymdar. Osy úsh bastaýǵa Qazaqstandaǵy árbir azamattyń, árbir otbasynyń bolashaǵy baılaýly. Endeshe bolashaǵy birtutas el qurý jolynda Otanymyz ben otbasymyzdaǵy beıbit ómirdi, ulttyq qundylyqtardy, rýhanı ustyndardy jáne tabıǵı tazalyqty ustap turýǵa umtylaıyq, bul mindetimizge jaýapty qaraıyq, aǵaıyn.
Baqytbek Smaǵul, Parlament Májilisiniń depýtaty, «Nur Otan» partııasynyń múshesi, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi