«Qaıyrymdy qala»: Shymkentte 100 otbasyǵa kómek kórsetildi

ShYMKENT. QazAqparat – Shymkentte Táýelsizdik kúni merekesine oraı ıgi ister jalǵasýda. Búgin «Shymkent – qaıyrymdy qala» aktsııasy aıasynda ortalyq «Aq meshit» meshitinde 100 otbasyǵa azyq-túlik úlestirildi, dep habarlaıdy QazAqparat tilshisi.

Qala ákimi Erlan Aıtahanovtyń tapsyrmasyna sáıkes jáne Abaı aýdany ákimshiliginiń uıymdastyrýymen áleýmettik qoldaýǵa muqtaj januıalarǵa kómekter berildi. Qala ákiminiń orynbasary Buharbaı Parmanov pen Abaı aýdanynyń ákimi Ǵalymjan Tólepov turǵyndardy ulyq merekemen quttyqtap, izgi nıetterin jetkizdi.

Qaıyrymdylyq sharalary munymen shektelmeıtinin, qoǵamdaǵy álsiz top músheleri qashan da qamqorlyqtan tys qalmaıtynyn atap ótti. Áleýmettik turmysy tómen januıalarǵa kórsetiletin qoldaýlar aldaǵy ýaqytta da jalǵasyn tabatynyn jetkizdi. Óz kezeginde kómek alǵan otbasy músheleri osy sharany uıymdastyrǵan qala basshylary men demeýshi azamattarǵa sheksiz alǵystaryn bildirdi.

Aıta keteıik, buǵan deıin «Shymkent – qaıyrymdy qala» aktsııasy aıasynda Qarataý aýdanynda turatyn 70 otbasyǵa kómek kórsetilgen bolatyn. Qarataý aýdandyq ákimdiginiń uıymdastyrýymen jáne Shymkent qalalyq Nur Otan partııasynyń qoldaýymen ótken sharaǵa jergilikti kásipkerler belsendi atsalysyp, turmysy tómen otbasylarǵa 4 mıllıon teńgeniń azyq-túligi jáne turmysqa qajetti zattary taratylǵan bolatyn. Sondaı-aq, isker azamattar «Qaınarbulaq» saıajaıynda órtenip ketken 3 úıdiń shatyryn jaýyp berip, aýdan aýmaǵyndaǵy mektepterge qaıyrymdylyqqa quny bir mıllıon teńgeden asatyn zattardy tabystaǵan.