Qaıyrymdy ister marafonynyń negizgi maqsaty qandaı

NUR-SULTAN. QazAqparat – Azamattyq bastamalardy qoldaý ortalyǵynyń basqarma tóraıymy Lıma Dıas búgin bastalǵan «Qaıyrymdy ister marafonynyń» negizgi baǵyttary týraly aıtty, dep habarlaıdy QazAqparat tilshisi.

«Qaıyrymdy ister» marafony aıasynda qandaı qadamdar qamtylyp otyr? Birinshiden, memleket pen bıznestiń, eriktilerdiń ári azamattardyń yntymaqtastyǵy men seriktestiginiń qoldaýyn bildiredi. «Qaıyrymdy ister marafony» jomarttyq men jaqsylyqtyń ıdeıasy negizindegi qoǵamdy qurýǵa umtylady. Marafonnyń tetigi metsenattar, úkimettik emes uıymdar jáne qarapaıym azamattar tap bolatyn basty máselelerge jaýap beredi», - dedi Lıma Dıas atalǵan marafonnyń ashylýyna arnalǵan jıynda.

Onyń aıtýynsha, «Qaıyrymdy ister marafony» kómek pen qoldaýdyń aıqyn qurylymyn qurýǵa negizdeledi. Atalǵan marafonnyń uıymdastyrý komıteti ádistemelik, aqparattyq, túsindirý jáne uıymdastyrý kómegin iske asyrady. Azamattyq bastamalardy qoldaý ortalyǵy uıymdastyrý komıteti qadamdaryn úılestiretin bolady.

«Uıymdastyrý komıteti marafon uranymen memlekettik organdar, korporatıvti bıznes-sektor men ÚEU tarapynan bastama retinde usynylatyn barlyq aqparat pen is-sharalardy qamtıtyn bolady. Osy oraıda biryńǵaı aqaparttyq keńistik qúrylady, onda túrli sanattardaǵy (donor, qaıyrymdylyq uıymy, erikti) marafon qatysýshylary tirkele alady», - dedi L. Dıas.

Budan buryn habarlanǵandaı, búgin elordada donorlar men metsenattardyń qatysýymen «Qaıyrymdy ister marafony» bastaldy.

Aıta keteıik, «Qaıyrymdy ister marafony» bastamasyn Memleket basshysy Qasym-Jomart Toqaev kótergen bolatyn.