«Qaıyrymdy ister marafonynan» kimder kómek suraı alady
Nur-Sultan qalasy Іshki saıasat basqarmasynyń basshysy Dáýren Babamuratov ákimdiktiń onlaın brıfınginde osyndaı málimet berdi.
«Qurban aıt kezinde qolǵa alǵan amal-nıetterimiz qabyl bolsyn! Osy mereke aıasynda 3 myńnan astam et bólikterin muqtaj otbasylarǵa taratyp jatyrmyz. Keshe myńǵa jýyq tarattyq, búgin jáne erteń taratamyz. Bul jerde de et taratylatyn otbasylar «Qaıyrymdy ister marafony» sııaqty resmı tizim boıynsha anyqtalǵan», - dedi Dýren Babamuratov.
Ákimdik ókiliniń sózine qaraǵanda, «Qaıyrymdy ister marafony» aıasynda beriletin kómek negizinen qaladaǵy aýdandyq ákimdikter bekitken tizim boıynsha taratylyp jatyr. Degenmen, eshbir sanatqa jatpasa da, naqty qınalyp otyrǵan otbasy bolsa, jergilikti ákimdikke júginip, kómek suraı alady.
«Nur-Sultan qalasyndaǵy 4 aýdanda áleýmettik baǵyttaǵy bólimder bar. Sol bólimderde osy tizimder jasaqtalady. Eger aýdandyq ákimshilikpen tikeleı baılanysta bolsańyz, tıisti aýdanǵa habarlasyp, jazylýǵa bolady. Ol jerde muqtaj otbasylardyń bekitilgen tizimi bar. Biz azyq-túlik sebetterin sol tizim boıynsha atalǵan aýdandar arqyly taratamyz. Bul iske qalalyq jáne aýdandyq ákimshilik qyzmetkerleri demalys kúnderi óz erikterimen qatysyp júr. Sonymen qatar, qalada 500-den astam volonterler korpýsy bar. Olar da tartylyp júr. Úkimettik emes uıym ókilderi men kásipkerler atsalysýda», - degen Іshki saıasat basqarmasynyń basshysy kómek alý úshin kimge júginý kerektigin túsindirdi.
«Muqtajdar qataryna negizi múmkindigi shekteýli jandar, kópbalaly otbasylar, jalǵyzilikti adamdar, tolymsyz otbasylar, múgedek bala asyrap otyrǵan otbasylar kiredi. Bul sanattarǵa jatpasa da, dál sol mezette azyq-túlik sebetine muqtajdyq sezingen otbasylar da kómek suraı alady. Ol úshin aýdandyq ákimdiktegi áleýemttik bólimge júginip, naqty muqtaj ekenin dáleldep, ótinish bildirse boldy», - dedi Dáýren Babamuratov.