«Qaıyrymdy ister marafony»: ShQO-da qandaı sharalar atqarylýda
«Qaıyrymdy ister marafony» uıymdar men qarapaıym qazaqstandyqtardy biriktiretin jalpyulttyq qozǵalys. Mundaǵy maqsat – adamdardy meıirimdi bolýǵa, jaqsylyq jasaýǵa yntalandyrý. Sebebi árbir qazaqstandyq azamat biz úshin qymbat. Shyǵys Qazaqstanda joba bastalǵaly beri shaǵyn jáne orta bıznes ókilderi, joǵarǵy oqý oryndary, kolledjder men mektepter, jeke kompanııalar, qaıyrymdylyq qorlary, qoǵamdyq uıymdar jáne 154 shaǵyn volonterlik toptar belsendi jumys júrgizýde. Olar muqtaj adamdarǵa kómek kórsetip, qan tapsyryp, aǵash otyrǵyzyp, ekologııalyq aktsııalarǵa qatysyp jatyr», - dedi oblystyq Jastar resýrstyq ortalyǵynyń basshysy Araılym Esimbekova.
Onyń aıtýynsha, marafon aıasynda óńirde 2173 shara uıymdastyrylyp, oǵan 16178 adam qatysqan.
«Koronavırýspen aıanbaı kúresip, talaı jandy ajaldan arashalap qalǵan dárigerlerge jerlesterimiz azyq-túlik sebetterin, qoldaý men shynaıy rızashylyqtary jazylǵan hattardy joldaýda. Aýyldaǵy mektep túlekteri biraz ýaqyttan keıin elge, jerge taǵzym etip, qaıyrymdy ister atqarýda. Mysaly, Aıagóz aýdanyndaǵy Qyzylqı orta mektebinen 2001 jyly túlep ushqandar aýyldyq ambýlatorııaǵa ÓJJ apparatyn alyp berip, 1,2 mln teńgege eldi mekenge abattandyrý jumystaryn júrgizgen. Zaısan aýdany Keńsaı aýyldyq okrýgindegi mektep túlekteri bilim ordasynyń akt zalyn kúrdeli jóndeýden ótkizdi. Sondaı-aq halyqaralyq donorlar kúni qarsańynda shyǵysqazaqstandyq 153 donordan 76 lıtr qan jınalǵan», - dedi Araılym Esimbekova.