«Qaıyrymdy bolǵysy kelgen mınıstr kim?» - baspasózge sholý
***
«Egemen Qazaqstan» gazetinde «Ortalyq saıabaq qala menshigine tolyq qaıtpaı tur" degen maqala jarııalandy. «Bir kezderi Qazaqstannyń barlyq qıyrynan bilim izdep aǵylǵan aǵa býyn men orta býynǵa Almatydaǵy Ortalyq demalys jáne mádenıet parkin tanystyryp jatýdyń qajeti joq. Alaıda, osy qalada týyp-ósken keıingilerdiń kóbi bul saıabaq týraly bile bermeıdi. Óıtkeni, qazir oıyn-saýyqtyń ózge túri jetip-artylady. Oǵan qosa keıingi jyldary kútim kórmeı turǵan demalys ornynda serýendeıtindeı sıyq qalmaǵan-dy. Sondyqtan byltyr tarıhy eń úlken saıabaqty qaıtaryp alýǵa qalalyq ákimdik kóp kúsh jumsaǵanyn jazǵan da bolatynbyz. Sóıtip, ótken jyly ony demalystyń zamanaýı talaptaryna saı ete almaǵan menshik ıeleri ony mýnıtsıpaldy menshikke qaıtarýǵa májbúr boldy»,-dep jazady basylym. Oǵan qosa, bir kezde barsha almatylyqtardyń ortaq yrzyǵy bolǵan park túgeldeı qala menshigine qaıtpaı otyr. Mundaǵy 67 nysannyń 47-si áli de «Altyn Taraz» kompanııasynyń quzyrynda. Burynǵy «Rodına» kınoteatry, attraktsıon alańdarynyń ózi túgili, astyndaǵy jeri de qala menshiginde áli joq.
***
«Aıqyn» gazetiniń jazýynsha, Qazaqstanda qaıyrymdylyq jasaýshy birlestikterge saıası partııalar men dinı qurylymdardy qarjylandyrýǵa tyıym salynady. Tipti olardyń óz múlikterin osy eki baǵyttaǵy uıymdarǵa berýine de shekteý qoıylady. Parlament qaraýǵa alǵan «Qaıyrymdylyq, demeýshilik jáne metsenattyq qyzmetter týraly» jańa zań jobasynda qatań talap jazylyp otyr. Ulttyq qaýipsizdikti saqtaý jáne qorǵaý maqsatynda memleket osy qadamǵa bardy. Keshe Májiliste arnaıy jumys toby qujatty talqyǵa saldy.
«Sonymen, jańa zań jobasynyń 11-babynda bylaı jazyldy: «Qaıyrymdylyq birlestiginiń saıası partııalar men dinı birlestikterdi qoldaý úshin óz qarajatyn jumsaýǵa jáne óz múlkin paıdalanýǵa quqyǵy joq». Bir qyzyǵy, qalaýlylar atalǵan tyıymdy basqalaryna da taratýdy oılap otyr. «Shet memleketterdiń, sheteldik jáne halyqaralyq uıymdardyń, sheteldikter men azamattyǵy joq adamdardyń óteýsiz beretin qarajaty arqasynda tek «qaıyrymdylyq birlestikteri» ǵana ómir súrip, qyzmetin júzege asyryp otyrǵan joq. Sondyqtan bul tyıym salýdy basqalarǵa da - jeke qaıyrymdylyq jasaýshy tulǵalarǵa, demeýshiler men metsenattarǵa da qoldaný qajet dep esepteımiz!» dep depýtattardyń ortaq ustanymyn bildirdi Májilistiń zańnama bólimi. Úkimet ókilderi qarsy bolmady.
Qazaqstanda jaqsylyqqa jaqyn turar, izgilik jasaýǵa qushtar jandar kóp. Biraq ókinishke qaraı keıbir pysyqaı adamdar qaıyrymdylyq qorlaryn baıý maqsatynda da qurady. Osyǵan tosqaýyl qoıý tetikteri de izdelýde»,-dep jazady gazet.
Máselen, quryltaıshylarǵa jáne osyndaı uıym basshylaryna tipti kásipkerlikten túsken tabysty da óz qaltasyna salýǵa jol berilmeıtin bolady: ol qarajat ta birlestik jarǵysynda jazylǵan qaıyrymdylyq isterine jumsalýy tıis! Osy jaıynda «Qaıyrymdy bolǵysy kelgen mınıstr kim?» degen maqaladan tolyq oqı alasyzdar.
Osy basylymdaǵy «Kókeıdegi saýal» aıdarynda «Sheneýnikterdi memlekettik qyzmetke alarda psıhofızıologııalyq testen ótkizý kerek pe?» degen másele kóterilip otyr. Bul turǵyda gazet birqatar mamandardyń pikirin ortaǵa salǵan. Ahat Kórpeshov, psıhıatr-dáriger:
- Memlekettik qyzmetke qabyldanatyndardy psıhofızıologııalyq tekserýden ótkizýdi baıaǵyda-aq engizý kerek edi. Bas prokýratýranyń keshendi tekserýleri nátıjesinde anyqtalǵan jaǵdaılardan keıin bul másele zańdastyrylatyn shyǵar. Quqyq qorǵaý organdarynyń emhanasynda jumysqa jańadan qabyldanatyndardy psıhıatrııalyq-psıhologııalyq keshendi testen ótkizý tájirıbesi baıaǵydan bar. Jumysqa turatyndardyń kóbisi osy tekserýden óte almaı jatady. Ondaılardy memlekettik qyzmetke qabyldaı beredi. Jalpy quqyq qorǵaý organdaryna qabyldaǵandaı qatań túrdegi test júrgizbeı-aq, sheneýnikterdi psıhofızıologııalyq tekserýden ótkizgen durys.
***
«Ekspress-K» gazetinde «Test za zdravıe» degen maqala basyldy.
Infektsııalyq indetterdiń dıagnostıkasy úshin Ońtústik Qazaqstanda Baýyrjan Aıtýov test-júıeni jasap shyǵardy. Jas ǵalymnyń aıtýynsha, onyń zertteýleri nátıjesinde qol jetkizilgen júıe zerthanalyq qymbat zertteýlerdi shalǵaıdaǵy aýyldyq aýrýhanada da júrgizýge múmkindik beredi.