Qaıyrbek Óskenbaev turǵyndardy sapaly aýyz sýmen qamtýda artta qalǵan óńirlerdi atady

NUR-SULTAN. QazAqparat – Aýyldyq eldi mekenderdi aýyzsýmen qamtýdyń eń tómengi deńgeıi Qostanaı jáne Soltústik Qazaqstan oblystarynda tirkelgen. Bul týraly búgin Úkimet otyrysynda Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Memleket basshysy halyqqa arnaǵan Joldaýynda 2025 jyly sapaly aýyz sýǵa qoljetimdilikti 100 paıyzǵa jetkizýdi tapsyrdy. Bul tapsyrmany oryndaý «Qýatty óńirler – el damýynyń draıveri» Ulttyq jobasy aıasynda josparlanǵan. Byltyr elimizde sýmen jabdyqtaý qyzmetterimen qamtamasyz etý 96 paıyzdy, onyń ishinde qalalarda – 98,1 paıyzdy, aýyldarda 93 paıyzdy qurady», - dedi mınıstr.

Ol jekelegen óńirlerde artta qalýshylyq baıqalatynyn da atap ótti. Aýyldyq eldi mekenderde aýyzsýmen qamtýdyń eń tómengi deńgeıi Qostanaı jáne Soltústik Qazaqstan oblystarynda saqtalǵan. Qalalyq jerdi sýmen jabdyqtaý qyzmeti Jambyl oblysynda kóńil kónshitpeıdi.

«Sýmen jabdyqtaý qyzmetterimen Soltústik Qazaqstan, Mańǵystaý, Atyraý jáne Qyzylorda oblystarynyń qala turǵyndary 100 paıyz qamtylǵan. Aýyldyq eldi mekenderdi atalǵan qyzmetpen qamtamasyz etý boıynsha kóshbasshylar qatarynda Almaty, Atyraý, Qyzylorda jáne Mańǵystaý oblystary bar», - dedi Qaıyrbek Óskenbaev.