Qaıyrbek Óskenbaev qurylys naryǵyn qalaı monopolııasyzdandyratynyn aıtty

NUR-SULTAN. QazAqparat – Qurylys naryǵyn qalaı monopolııasyzdandyrý 3 negizgi baǵyttaǵy is-sharalardy qamtıdy. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

Mınıstrdiń atap ótýinshe, Memleket basshysynyń «Qazaqstan Respýblıkasy Básekelestikti qorǵaý jáne damytý agenttigimen birlesip, qurylys naryǵyn monopolııasyzdandyrý jáne ony básekeli damytý jóninde sharalar paketin qabyldaý» tapsyrmasy negizinde mınıstrlik atalǵan agenttikpen birlesip, osal tustardy pysyqtady jáne 3 negizgi baǵyt boıynsha is-sharalardy anyqtady. Olar: úlestik qurylysqa qatysýdy retteý; jer berý jáne qurylys salýdy josparlaý; memlekettik satyp alý rásimderin jetildirý.

«Ázirlengen is-sharalardy iske asyrý úshin turǵyn úı qurylysyna úlestik qatysý salasyndaǵy talaptardy qaıta qaraý, sondaı-aq Jer kodeksine jáne Memlekettik satyp alý týraly zańǵa ózgerister engizý qajet. Ózgerister jer ýchaskelerin konkýrstan tys berýdi boldyrmaýdy, zańnamany aınalyp ótýge jaýaptylyqty kúsheıtý jáne úleskerlerdiń qarajatyn zańsyz tartýdy anyqtaý arqyly úlestik qurylystaǵy talaptardy jetildirýdi kózdeıtin bolady», - dedi Qaıyrbek Óskenbaev.

Sonymen atar ol memlekettik satyp alý bóliginde tender kezeńinde materıaldyq resýrstardy kórsete otyryp, jumystar júrgizý jobalaryn usyný mindettemesin engizý; konkýrsqa qatysý úshin satyp alýdyń shekti somasyn belgileý, sondaı-aq jumystar men kórsetiletin qyzmetter túrleri boıynsha tólengen salyqtar kórsetkishiniń ara-jigin ajyratý; qosalqy merdigerlik bóligindegi ózara qarym-qatynastardy ákimshilendirý engizý kózdelgenin aıtty.

«Zańnamalyq túzetýlerdiń tıisti paketi ázirlendi», - dedi mınıstr.