Qaıyrbek Óskenbaev: Baspana baǵasy túpkilikti turaqtanady

NUR-SULTAN. QazAqparat – Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev turǵyn úı baǵasy qashan turaqtanatynyn aıtty, dep habarlaıdy QazAqparat tilshisi.

«Biz apta saıyn jyljymaıtyn múlik baǵasyn baqylap otyramyz. Jańa baǵdarlama engizilgennen keıin turǵyn úı baǵasy kóterile bastady. Bastapqy naryqtaǵy turǵyn úı quny qańtarda 3 paıyzǵa, qaıtalama naryqtaǵy turǵyn úı 17 paıyzǵa qymbattady. Naýryzda baǵanyń ósýi toqtady. Birinshisi 0,5 paıyzǵa, al ekinshisi eki paıyzǵa qymbattady. Sáýir men mamyr aılarynda ósim toqtaıdy, al maýsym men shildede baǵalar turaqtanady dep oılaımyz», - dedi vıtse-mınıstr.

Degenmen, «Otbasy bank» AQ basqarma tóraǵasy baǵalarǵa júrgizilgen taldaý álem boıynsha qurylysta paıdalanylatyn shıkizat pen materıaldar baǵasynyń óskenin kórsetti dep otyr.

«Jyljymaıtyn múliktiń ózindik baǵasynda eńbek resýrstarynyń quny óte úlken úleske ıe. Qazaqstandaǵy ortasha jalaqy statıstıkasyna qarasaq, 2020 jyldyń tórtinshi toqsanynyń qorytyndysy boıynsha 233 136 teńge boldy. Búgin resmı statıstıka shyqty. Birinshi toqsannyń qorytyndysy boıynsha nomınaldy ortasha jalaqy shamamen 11 paıyzǵa ósti. Tıisinshe, kranshylardyń, monolıt quıatyn qyzmetkerlerdiń, árleýshilerdiń eńbegi jyljymaıtyn múliktiń bastapqy naryǵyna áser etedi. Biz óz tarapymyzdan taldaý júrgizip, jyldyń ekinshi jartysynda, buǵan deıin boljaǵanymyzdaı, mamyrdyń sońy men maýsymnyń basynan bastap baǵa naryǵy turaqtanady dep oılaımyz», - dedi bank tóraıymy.

Eske salsaq, «Otbasy banki» ókili «Elorda jastary» baǵdarlamasyna qaı mamandyq ıeleri qatysa alatynyn málim etken bolatyn.

Buǵan deıin habarlaǵanymyzdaı, mamyr aıynda «Shańyraq» baǵdarlamasy boıynsha beriletin 8000 páter Baspana.kz saıtyna shyǵarylady.