Qaıyrbek Óskenbaev Atyraýdan Reseıge deıingi jol qurylysyn tekserdi
Mınıstr Atyraý oblysyndaǵy Isataı jáne Qurmanǵazy aýdandarynyń turǵyndarymen kezdesti. Shalǵaı eldimeken turǵyndarymen kezdesýde aımaqtaǵy qordalanǵan máseleler talqylandy. Jol jóndeý jumystarynyń barysy týraly jan-jaqty málimetter aıtyldy. Jergilikti turǵyndardyń talap-tilegin tyńdady.
«Esterińizde bolsa, Atyraý oblysyna aıyna bir ret mindetti túrde kelýge ýáde bergen bolatynmyn. Basty maqsatym – óńirde júrgizilip jatqan jumystardyń sapasy men oryndalý merzimin jiti qadaǵalaý. Ótken joly Atyraýdan kelsem, bul joly Oral arqyly jol túsip otyr. Qazir oblys ortalyqtarynda da jol jóndeý jumystary júrgizilip jatyr. Osy saparymda sol jumystarmen de tanysýǵa týra keldi. Memleket basshysy óńirdegi kólik joldarynyń ahýalyna erekshe nazar aýdaryp otyr. Sondyqtan, biz atqarylyp jatqan jumystardy turaqty túrde árdaıym baqylaýda ustaımyz», - dedi Qurmanǵazy aýylynyń turǵyndarymen kezdesýde Qaıyrbek Óskenbaev.
Turǵyndardyń aıtýynsha, qazir jol qurylysynyń nysandarynda jumys qarqyn alǵan. Jol jóndeý men tehnıkalardyń sany kóbeıgen.
Sondaı-aq, mınıstr «Atyraý-Reseı Federatsııasynyń shekarasy» baǵytynda jańǵyrtylyp jatqan jol qurylysynyń birqatar qurylys nysanyn aralyp, merdiger kompanııa ókilderimen kezdesý ótkizdi.
Eske sala ketelik, budan buryn mınıstr Atyraý-Astrahan avtojoly aıaqtalǵansha barlyq basshylar qurylys basynda bolatynyn aıtqan edi.