Qaıyńdyda matraspen júzgen vıdeo avtorlary jazalanýy múmkin

NUR-SULTAN. QazAqparat – Qazaqstandyqtar aıryqsha qorǵalatyn tabıǵı aýmaq – Qaıyńdy kóliniń ortasynda úrlemeli matrasta júzgen qyzdyń beınerolıgin qyzý talqylaýda. Ekologııa mınıstrligi vıdeo avtorlarynyń jazalanatynyn aıtty, dep habarlaıdy QazAqparat.

«Barlyǵyna qoıylatyn jalpy talap – erekshe qorǵalatyn tabıǵı aýmaqtarda júrý tártibin buzýǵa bolmaıdy. Qarapaıym erejelerdi buzǵany úshin QR ÁQBtK-niń 380-babyna sáıkes eskertý nemese aıyppul qarastyrylǵan. Dostar, munyń bári óte mańyzdy. Jaýapqa tartýdan basqa, jazataıym oqıǵalar bolýy múmkin. Nelikten qorshaǵan ortaǵa, onyń biregeıligine zııan keltirý kerek?!», - dep jazdy Ekologııa, geologııa jáne sý resýrstary mınıstrliginiń baspasóz hatshysy Samal Ibraeva Facebook jelisinde.

Onyń aıtýynsha, ınspektorlar rolık avtorlaryna qatysty quqyqbuzýshylyq hattamasyn toltyryp jatyr.

«Týrısterdiń qyzǵylt Kóbeıtuz kólimen ne istegenin eske túsireıik. Onda adamdar biregeı sý qoımasyna kóliktermen kirip, qoqys tastap, tabıǵı tuzdy alyp ketti. Ókinishke oraı, tabıǵatqa osyndaı varvarlyq jasaý jaǵdaıy qaıtalanýda. Bul ulttyq saıabaqtarda ınfraqurylymnyń, órkenıetti tásildiń jáne EKO týrızmniń mańyzdy ekenin taǵy da dáleldeıdi. Áıtpese, mundaı «jabaıy» týrızm tek kóbeıe beredi», - dep pikir bildirdi S. Ibraeva.

Mınıstrlik ókili qazaqstandyqtarǵa úndeý jasady.

«Týrıstik maýsym bastalyp jatyr. Bizdiń Qazaqstanda ádemi tabıǵaty bar kóptegen oryndar bar, olarǵa barý óte mańyzdy. Qazaqstannyń tabıǵaty esh jerde qaıtalanbaıdy! Sońǵy jyldary kóptegen adamdardyń elimizdi jańa qyrynan ashqany qýantady. Biraq! Bizdiń ortaq mindetimiz – jalpy qabyldanǵan normalar men erejelerdi saqtaý. Tabıǵatty qorǵap, óskeleń urpaqqa patrıotızm men janýarlarǵa, ósimdikterge, ormanǵa, taýlarǵa degen súıispenshilikte tárbıeleıik!», - deıdi baspasóz hatshysy.