Qaıyń shyrynyn alǵandarǵa 35 myń teńge shamasynda aıyppul bar

PETROPAVL. QazAqparat – Soltústik Qazaqstan oblysynda Tabıǵı resýrstar jáne tabıǵat paıdalanýdy retteý basqarmasynyń mamandary turǵyndardy ormanǵa baryp qaıyń shyrynan alý zańsyz ekenin eskertti. Ony elemegenderge 10 AEK mólsherinde aıyppul salynady, dep habarlaıdy QazAqparat tilshisi.

SQO tabıǵı resýrstar jáne tabıǵat paıdalanýdy retteý basqarmasynyń málimetinshe, kúnniń jylynýymen aǵashtarda sól júrý kezeńi bastalady.

Qaıyń shyrynyn unatatyndar mundaıda balta-pyshaqpen qarýlanyp, ormanǵa barady. Biraq, bul – zańsyz.

«Ókinishke qaraı, halyqtyń jekelegen sanatynyń tutynýshylyq qumarlyǵy kóbinese sana men jaýapkershilik seziminen basym bolady, saldarynan qorshaǵan ortaǵa aıtarlyqtaı zııan keltiredi. Qaıyń shyryny qysqy uıqydan aǵashtyń oıanyp, ósip, japyraqtary gúldenýi úshin butaqtarǵa qajetti qorektik zattardy jetkizedi. Aǵashtyń qabyǵyn arshyp, shyrynyn aǵyzǵannan keıin olardyń kópshiligi aýrýǵa shaldyǵady, ósimdikterdiń qaýipti aýrýlary osy jaralar arqyly aǵashqa enedi, tez shirıdi», - deıdi basqarmanyń bólim mamany Sáýle Súleımenova.

Memlekettik orman qory ýchaskelerinde qaıyńnyń aǵash shyrynyn daıyndaý jospar boıynsha júrgizilip, jaqyn arada kesiletin, pisip-jetilgen aǵashtarda júrgiziledi.

«Shaıyrdy, aǵash shyrynyn, qosalqy resýrstardy daıyndaý qaǵıdalaryna sáıkes shyryndy kesýge keminde bes jyl qalǵan aǵashtardan alýǵa bolady. Shyryn daıyndaý kezinde zańdy tulǵalar men jeke kásipkerlerde memlekettik orman sharýashylyǵy jazyp bergen orman bıleti bolýy tıis. Qaıyń shyrynyn daıyndaýdy júzege asyrýǵa bolatyn orman ýchaskeleri týraly qajetti aqparatty alý úshin turǵylyqty mekenjaıy boıynsha orman sharýashylyǵyna júginý qajet, onda qaıyń shyrynyn zańdy túrde daıyndaý úshin qandaı ruqsat qujattary qajet ekenin bilýge bolady», - deıdi Sáýle Súleımenova.

Mamannyń aıtýynsha, talap saqtalmaǵan jaǵdaıda aıyppul salynady.

Ákimshilik quqyq buzýshylyq týraly Ákimshilik kodekske sáıkes kespeaǵash qoryn paıdalanýdyń, súrek daıyndaý men áketýdiń, shaıyr men aǵash shyrynyn, qosalqy orman materıaldaryn alýdyń belgilengen tártibin buzǵany úshin jaýapkershilik kózdelgen. Jeke tulǵalarǵa 10 AEK nemese 34 500 teńge mólsherinde, laýazymdy tulǵalarǵa, shaǵyn kásipkerlik sýbektilerine 30 AEK nemese 103 500 teńge mólsherinde, orta kásipkerlik sýbektilerine 50 AEK nemese 172 500 teńge mólsherinde aıyppul qarastyrylǵan.