Qaıtys bolǵan naýqastyń týystary qostanaılyq jedel járdem feldsherin soqqyǵa jyqty

<p>ASTANA. KAZINFORM — Feldsherge shabýyl shaqyrýlardyń birinde bolǵan. Qazirgi ýaqytta zardap shekken medıtsına qyzmetkeri aýrýhanada, qylmystyq is qozǵaldy.</p>

Bul oqıǵa týraly aqparat áleýmettik jeliden belgili boldy. Zardap shekken feldsher óz paraqshasynda bar shyndyqty aıtqan.

— Adamdar qandaı qatygez. Keshe alǵashqy medıtsınalyq kómek kórsetip jatqan jerimde meni uryp tastady. Olar meni óltirgisi keldi. Men mıym shaıqalyp, ishim jaraqattanyp, aýrýhanaǵa tústim, — dep jazdy medıtsına qyzmetkeri.

Bul derekti oblystyq jedel járdem stantsııasynyń baspasóz qyzmeti rastady. Olardyń aıtýynsha, feldsherge qyzmettik mindetterin oryndaý kezinde shabýyl jasalǵan. Ol aýrýhanaǵa jatqyzyldy.

Polıtsııa qylmystyq is qozǵalǵanyn habarlady.

— Alǵashqy medıtsınalyq kómek kórsetý kezinde úı ıeleri men dárigerler arasynda janjal týyndap, onyń barysynda 41 jáne 51 jastaǵy áıelder feldsherdiń denesine zaqym keltirgeni anyqtaldy, — dedi polıtsııa.

Sot-medıtsınalyq saraptama taǵaıyndaldy. Tergeý «uryp-soǵý» baby boıynsha júrgizilip jatyr.

Buǵan deıin Beıneýde mas adam jedel járdem qyzmetkerlerine shabýyl jasaǵanyn jazdyq.