Qaıtarymsyz granttardyń kóbisi Túrkistan, Qyzylorda, Jambyl oblystarynyń jastaryna berildi
Onyń ishinde 21,2 myńy jeke kásipker retinde tirkeldi, 32 grant alýshy JShS ashty, 173 adam jeke kásipker retinde BJT tóleıdi.
«2022 jyly qaıtarymsyz granttar: mal ósirýge – 8,2 myń, tehnologııalyq jabdyq satyp alýǵa – 8 myń, qural-jabdyq satyp alýǵa – 3,5 myń, qural – saımandarǵa – 1,3 myń, ósimdik sharýashylyǵyna – 0,2 myń, sondaı-aq basqa da maqsattarǵa berildi. Alýshylar sanaty boıynsha 11,1 myń grant jastarǵa, 6,1 myńy kópbalaly otbasy múshelerine, 1,9 myńy múgedektigi bar adamdarǵa, 1,3 myńy múgedektigi bar balalardy tárbıelep otyrǵan ata-analarǵa, 796 – ataýly áleýmettik kómek alýshylarǵa, 290-y qonys aýdarýshylar men qandastarǵa, 238-i asyraýshysynan aıyrylý boıynsha tólem alýshylarǵa berildi», - dep jazdy Eńbek jáne áleýmettik qorǵaý mınıstrliginen.
2022 jyly grant mólsheri 400 AEK nemese 1,3 mln teńgege deıin qurady.
Granttardyń eń kóp sany Qyzylorda (3,4 myń), Túrkistan (2,9 myń) jáne Jambyl (2,6 myń) oblystarynda berildi. Barlyǵy 21,7 myńnan astam grant úlestirildi.
Ótken jyly Rıdder qalasynan Ekaterına Hýdıakova grant aldy. Ol At sporty klýbyn damytý úshin qural-jabdyqtar satyp alýǵa 1,2 mln teńge kóleminde memlekettik kómek aldy.
«Men jumyspen qamtý basqarmasynan grant týraly bildim, olar maǵan barlyq kezeńderde baǵyt berip otyrdy. Aldymen tıisti kýrstardan óttim, sodan keıin jobamdy qorǵadym. Berilgen aqshaǵa qajetti jabdyqty, qoımaǵa arnalǵan konteınerdi satyp alyp, sol jerde kıim aýystyratyn bólme jabdyqtadym. Bizdiń at sporty ponı klýby óz jumysyn 2021 jyldyń qazan aıynda bastady jáne bizdiń qaladaǵy jalǵyz klýb. Biz at sporty týrızmi, múgedektigi bar azamattarǵa arnalǵan ıppoterapııa, at sporty boıynsha oqytý qyzmetterin usynamyz. Biz sektsııalardy demalys kúnderi aýa-raıyna baılanysty ótkizemiz», – dedi Ekaterına Hýdıakova.
Jaqyn arada isker Ekaterına shtatty keńeıtip, jumys oryndaryn ashýdy josparlap otyr.
Memlekettik granttyń kómegimen bıznes-ıdeıany iske asyrýdyń taǵy bir sátti mysaly – óz isin damytýǵa 1,2 mln teńge alǵan Qaraǵandy oblysynan Svetlana Qudaıchýktyń oqıǵasy.
«Men 2022 jyly Osakarov aýdanynyń halyqty jumyspen qamtý ortalyǵyna habarlasyp, memleketti qoldaý sharalary týraly bildim, bıznes-bastamalardy iske asyrý úshin memlekettik granttar berý konkýrsyna qatystym. Alynǵan aqshaǵa men kofehana ashtym. Osy múmkindiktiń arqasynda qazir meniń shaǵyn bıznesim tabysty iske asyrylýda», – dep bólisti kásipker.
Svetlana Kýdlaıchýk bolashaqta óz bıznesin keńeıtýdi josparlap otyr.
Buǵan deıin habarlanǵandaı, 2023 jyly 2021-2025 jyldarǵa arnalǵan kásipkerlikti damytý jónindegi ulttyq joba sheńberinde 9 myń grant berý kózdelgen. Granttar berý 4 aǵymda júzege asyrylady. Birinshi aǵyn aıasynda 2 434 grant berildi.
Granttardy halyqty jumyspen qamtý ortalyqtary grant alýǵa úmitkerlerdiń ótinishterin qaraý jónindegi aýdandyq/qalalyq komıssııanyń sheshimi negizinde beredi.
Úmitkerler ózderiniń bıznes-jobalaryn komıssııa otyrystarynda tanystyrady. Komıssııa otyrysynyń ótkiziletin orny, kúni men ýaqyty týraly habarlama Business.enbek.kz portalynda grant alýǵa ótinish berýshiniń jeke kabınetinde kórsetiledi.
Bul rette komıssııanyń árbir múshesi bıznes-jospardy baǵalaıdy jáne baǵalaý paraǵyn mynadaı krıterııler boıynsha toltyrady: bıznes-ıdeıanyń básekege qabilettiligi, ótkizý naryqtarynyń pysyqtalýy, bıznes-jobanyń qarjylyq ómirsheńdigi, kásipkerlik daǵdylardyń deńgeıi, jańa jumys oryndaryn qurý.
Osylaısha, grant berý týraly sheshim komıssııalyq jáne úmitkerlerdiń bıznes-jobalarynyń pysyqtalýyn baǵalaýdyń naqty krıterııleri negizinde qabyldanady.
Komıssııanyń sheshimi úmitkerdiń Business.enbek.kz portalyndaǵy jeke kabınetine jiberiledi. Komıssııa oń sheshim qabyldaǵan jaǵdaıda úmitker banktik derektemelerdi usynady, shartqa qol qoıady jáne odan ári toqsan saıyn bólingen qarajattyń paıdalanylýy týraly esepterdi usynady. Munyń bári halyqty jumyspen qamtý ortalyqtaryna barmaı-aq, elektrondyq formatta jasalady.