Qaıtarymsyz grant utyp alǵan atyraýlyq jigit óz aýylynan kınozal ashty
Mahambet aýdanynda turatyn jas kásipker Álibek Jumaǵalıev ózi turatyn aýylynda shaǵyn kınozal ashty. Ol osy jobasy úshin jańa bıznes-ıdeıalardy iske asyrýǵa beriletin 1 mln 225 myń teńgeniń qaıtarymsyz grantyna ıe bolǵan.
«Aýdan ortalyǵy – Mahambet aýylynda turamyn. Osyndaǵy «Bıznes-ınkýbator» ǵımaratynan ashqan jańa kınozalǵa ár býynnyń ókilderi keledi. Kúndiz balalarǵa arnalǵan qyzyqty mýltfılmder qoıamyz. Keshke eresekter, otbasymen, dostarymen jınalyp, túrli fılmdi kóredi. Bılet baǵasy balalar úshin 800 teńge, eresekterge 1200 teńge. Ázirge zaldyń sharshy metri 10 adamǵa ǵana arnalǵan», -deıdi Álibek Jumaǵalıev.
Onyń aıtýynsha, kınozalǵa kelýshilerdiń basym bóligi – oqýshylar men jasóspirimder. Ár aptanyń sársenbisinde áleýmettik jaǵdaıy tómen otbasylardyń balalaryna kıno tegin kórsetiledi.
«Qaıtarymsyz grant qarjysyna qajetti qurylǵylardy, LED ekrandy satyp aldym. Keıin zaldy daıyndap, jóndeý júrgizdik. Ázirge arnaıy formattaǵy fılmderdi ǵalamtordan alyp otyrmyz. Prokatqa birden múmkindik bolmady. Kelýshiler sany kóbeıse, zaldy keńeıtýdi oılastyryp júrmin. Jańa fılmderdi kórsetkimiz keledi», -deıdi jas kásipker.
Mahambet aýdandyq ákimdiginiń málimetinshe, byltyr jańashyl bıznes-ıdeıalardy iske asyrýǵa beriletin qaıtarymsyz grantty 30 adam utqan. Onyń 15-i jastar bolsa, qalǵany áleýmettik osal top sanatyndaǵy jandar.
Eske sala ketelik, buǵan deıin Atyraý oblysynyń kásipkerlerine 1,9 mlrd teńgeniń sýbsıdııasy beriletinin jazǵan bolatynbyz.