Qaıtarylǵan jer jergilikti sharýalardyń arasynda ádil bólinýi tıis - Prezıdent

TALDYQORǴAN. QazAqparat – Memleket menshigine qaıtarylǵan jer sharýalar arasynda ádil bólinýi tıis. Bul týraly Memleket basshysy Qasym-Jomart Toqaev Jetisý oblysynyń jurtshylyǵymen kezdesýinde aıtty, dep habarlaıdy QazAqparat Aqordaǵa silteme jasap.

«Jetisý ólkesiniń aýyl sharýashylyǵyndaǵy áleýeti óte zor. Tabıǵaty – jaıly, jeri – qunarly. Munda jer de, sý da jetedi. Tek ony tıimdi paıdalaný kerek. Meniń tapsyrmam boıynsha Úkimet bıyl 5 mıllıon gektarǵa jýyq bos jatqan jerdi memleket menshigine qaıtardy. Biz osylaı aýyldardyń mańyndaǵy jer tapshylyǵy máselesin sheshemiz. Qaıtarylǵan jer jergilikti sharýalardyń arasynda ádil bólinip, berilýge tıis. Bul ádiletti qoǵam qurý jolyndaǵy mańyzdy qadam bolady», - dedi Prezıdent.

Sondaı-aq, Memleket basshysy Jetisý oblysy boıynsha 100 myń gektardan astam ıgerilmeı jatqan jer anyqtalǵanyna toqtaldy. Sonyń jartysy memleket menshigine qaıtarylǵan.

«Jer – halyqtyń baılyǵy. Ol barlyq azamattyń ıgiligine jaraýy kerek. Ákimder bul máseleni qatań baqylaýda ustaýy qajet», - dedi Prezıdent.