Qaıtarylǵan aktıvterdi basqarý kompanııasyna qandaı mamandar tartylady

ASTANA. QazAqparat – Qazaqstanda «Qaıtarylǵan aktıvterdi basqarý jónindegi kompanııa» jaýapkershiligi shekteýli seriktestigin qurý jumysy jalǵasyp jatyr. Seriktestik Qarjy mınıstrliginiń Memlekettik múlik jáne jekeshelendirý komıtetiniń qaramaǵynda bolýy múmkin, dep habarlaıdy QazAqparat tilshisi.

Qarjy mınıstrliginiń málimetinshe, kompanııanyń jalǵyz quryltaıshysy jáne qatysýshysy - Qazaqstan Respýlıkasynyń Úkimeti.

«Shtat sany úlken emes, shamamen 15-20 adamǵa deıin bolady. Shtat zańgerlik jáne ekonomıkalyq bilimi bar, shet tilderin meńgergen mamandardan jasaqtalady dep josparlanyp otyr», - delingen QazAqparat tilshisiniń saýalyna joldanǵan mınıstrlik jaýabynda.

Vedomstvodan málim etkendeı, bul kompanııany kim basqaratyny, basshyǵa qandaı talap qoıylatyny jáne qyzmetkerlerdiń qaı ǵımaratta jumys isteıtini týraly máseleler pysyqtalyp jatyr.

Jaýapkershiligi shekteýli seriktestik týraly zańda kózdelgen organdardan basqa, kompanııada Qamqorshylyq keńesi qurylady. Onyń quramyna QR Parlamentiniń depýtattary, qoǵam ókilderi men táýelsiz sarapshylar enýi múmkin.

Kompanııany qarjylandyrý eki kózden júrgizilýi yqtımal. Atap aıtqanda, aldaǵy jylǵa arnalǵan respýblıkalyq bıýdjetten qarjylandyrý bolmaǵan jaǵdaıda, óz qyzmeti úshin komıssııalyq syıaqy esebinen nemese shyǵyndar respýblıkalyq bıýdjet qarajatynan jabylady.

«Komıssııalyq syıaqylardyń mólsheri tıisti qarjy jylyndaǵy basqarýshy kompanııanyń aǵymdaǵy shyǵyndaryn qarjylandyrýǵa qajetti qarajat kólemimen shekteledi», - dep túsindirdi Qarjy mınıstrliginen.

Eske salaıyq, buǵan deıin «Qaıtarylǵan aktıvterdi basqarý jónindegi kompanııa» qurylatynyn jazyp edik.