Qaıtarylǵan qarajattyń bir bóligin turǵyn úı salýǵa jumsaý qajet – Nurtaı Sabılıanov

<p>ASTANA. KAZINFORM &ndash; Elimizde 647 myńnan astam adam baspana kezeginde tur. Bul týraly Premer-Mınıstr Oljas Bektenovtiń atyna saýal joldaǵan Májilis depýtaty Nurtaı Sabılıanov aıtty.</p>

«Abaı oblysynda halyqpen kezdesýler ótkizgende kezekte turǵan azamattar turǵyn úımen qamtamasyz etý máselesin jıi kóterdi. Bul másele barlyq óńirde ózekti bolyp tur. Ýákiletti organnyń aqparatyna sáıkes, respýblıka boıynsha turǵyn úı kezegine 647 117 adam tur. Onyń ishinde, Astana qalasynda - 40 myń adam, Almaty qalasynda – 43 myń adam, Túrkistan oblysynda – 62 myń adam, Aqtóbe oblysynda – 36 myń adam. 2024 jylǵa respýblıkalyq bıýdjetten 5090 páterdi salýǵa 69,3 mlrd teńge qarajat bólingen. Sonymen qatar, 7 522 páterli kredıttik turǵyn úıdi salýǵa 87 mlrd teńge qarastyrylǵan. Ol tek kezekte turǵan adamdar sanynyń 2 paıyzyn ǵana turǵyn úımen qamtamasyz etedi», - dedi Májilis depýtaty.

Onyń dereginshe, Abaı oblysynda 19373 azamat turǵyn úı kezeginde tur. Al, Semeı qalasynda - 14 000 adam. Depýtattyń qabyldaýynda bolǵan azamattar kezekten úı alǵanǵa deıin ýaqytsha turatyn úı, jataqhana berýdi uıymdastyrý týraly usynysyn jetkizgen.

«Jalpy, kezekte turǵandardy turǵyn úımen qamtamasyz etýdi jaqsartý baǵytynda Parlament Májilisi tıisti zańdarǵa ózgerister engizip, jergilikti atqarýshy organdarǵa daıyn turǵyn úılerdi satyp alý quzyreti berildi. Qarajat bólinse, kezekte turǵan adamdarǵa úı alý múmkindigi artady. Sondaı-aq, «Zańsyz ıemdengen aktıvterdi memleketke qaıtarý týraly» Zańǵa sáıkes memleketke qaıtarylǵan qarajat áleýmettik jobalarǵa, turǵyn úımen qamtamasyz etýge de jumsalýy qajet. «AMANAT» partııasynyń saılaýaldy baǵdarlamasynda 730 myńnan astam otbasy úshin qoljetimdi baǵadaǵy jańa turǵyn úı salý josparyn iske asyrý qarastyrylǵan», - dedi ol.

Osyǵan baılanysty Nurtaı Sabılıanov Úkimet basshysynan mynadaı máselelerdi qarastyrýdy surady:

•⁠ ⁠respýblıkalyq bıýdjetten turǵyn úı salýǵa qosymsha qarajat bólý;

•⁠ ⁠zańsyz ıemdelgen aktıvterdiń memleketke qaıtarylǵan qarajatynyń bir bóligin turǵyn úı qurylysyna jáne jańa úılerdi satyp alýǵa jumsaý;

•⁠ ⁠3 jyldyq respýblıkalyq bıýdjetten jergilikti bıýdjetke sýbventsııa bergende turǵyn úı salýǵa, satyp alýǵa qajetti qarajat qarastyrý;

•⁠ ⁠turǵyn úı salýǵa baǵaly qaǵazdar shyǵarý arqyly qarajat tartý;

•⁠ ⁠kezekte turǵan azamattardy turǵyn úı kezegi kelgenge deıin ýaqytsha turatyn úımen qamtamasyz etý máselelerin qarastyrý.