Qaıtarylatyn aktıvter Ulttyq qorǵa aýdaryla ma

<p>Májilistiń jalpy otyrysynan keıin BAQ ókilderiniń saýalyna jaýap bergen Qarjy mınıstri Erulan Jamaýbaev qaıtarylatyn aktıvterdi Ulttyq qorǵa aýdarý bastamasyna pikir bildirdi, dep habarlaıdy <a href="https://kaz.inform.kz/" target="_blank" rel="noopener">QazAqparat </a>tilshisi.</p>

«Ulttyq qordyń eki fýnktsııasy bar: jınaqtaý jáne turaqtandyrý. Ulttyq qordan mańyzdy áleýmettik ekonomıkalyq jobalardy iske asyrý úshin de qarajat bólinedi. Al aktıvterdi qaıtarý jónindegi zań sheńberinde bul qarajat komıssııanyń sheshimi arqyly ashyq ári ádil túrde áleýmettik-ekonomıkalyq máselelerdi sheshýge baǵyttalady. Ony Joǵary aýdıtorlyq palata da teksere alady. Men budan eshqandaı problema kórip turǵan joqpyn. Aqshanyń elge oralýy jáne olardyń ekonomıka úshin jumys isteýi mańyzdy», - dedi Erulan Jamaýbaev BAQ ókilderiniń saýalyna jaýap bere otyryp.

Eske salaıyq, taıaýda qaıtarylǵan aktıvterdi basqaratyn kompanııa qurý týraly Úkimet qaýlysy shyqty.

Sonymen qatar taıaýda qaıtarylǵan aktıvterdi basqarý kompanııasyna qandaı mamandardyń tartylatynyn jazyp edik.