Qaıtalanatyn IMEI kodtardyń kesirinen bıýdjetke 100 mlrd teńge túspeı qalǵan

ASTANA. QazAqparat – Qaıtalanatyn abonentterdiń saldarynan el bıýdjetine aýqymdy kólemde alym-salyq tólenbeı otyr. Bul jaıynda Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın málim etti, dep habarlaıdy QazAqparat tilshisi.

«Tsıfrlandyrýdy damytýdyń jańa jaǵdaıynda uıaly baılanys - kommýnıkatsııa quraly ǵana emes, sonymen qatar jeke derekterdi, qarajatty, bank kartalaryn saqtaýǵa arnalǵan platforma. Sondaı-aq, gadjettiń kómegimen onlaın rejımde kredıt, mıkroqaryz resimdeýge jáne túrli memlekettik qyzmetti alýǵa bolady. Osy oraıda elge uıaly telefondardy, sonyń ishinde IMEI qaıtalanatyn kodtaryn ákelýdiń «sur» shemasy jóninde aıta ketken jón», - dedi Baǵdat Mýsın Úkimet otyrysynda baıandama jasap.

Mınıstrdiń málimetinshe, qazir elimizde uıaly kompanııalar jelisiniń sáıkestendirý kodtarynyń derekqorynda (IMEI kod) qaıtalanatyn 3,7 mıllıon abonent bar.

«Qaıtalanatyn abonentterdiń bolýynan memleket bıýdjetine salyq pen alym túrinde shamamen 100 mlrd teńge túspeı qalǵan. Sonymen qatar qaıtalanatyn IMEI kodtar quqyq qorǵaý organdaryna urlanǵan uıaly telefondardy izdeý jáne olardy buǵattaý boıynsha jedel jumys júrgizýge múmkindik bermeı otyr», - deıdi ol.

B. Mýsınniń aıtýynsha, mınıstrlik «IMEI kodtar derekqoryn» keden qyzmetiniń júıesimen ıntegratsııalaýdy jáne abonentterdi tirkeý kezinde bıometrııany qoldanýdy josparlap otyr.

«Qazirdiń ózinde Іshki ister mınıstrligimen birlesip, urlanǵan telefondardyń IMEI kodtaryn tekserýge bolady», - deıdi vedomstvo basshysy.