Qaıta satýǵa qoıylǵan Qazaq Air kompanııasynyń 38 mlrd teńge qaryzy bar

<p>ASTANA. KAZINFORM &ndash; &laquo;Qazaq Air&raquo; áýe kompanııasyn satý týraly jańa konkýrs ótip jatyr. Bul týraly &laquo;Samuryq-Qazyna&raquo; AQ damý jáne jekeshelendirý jónindegi basqarýshy dırektory Saltanat Sátjan málim etti.</p>

«Bizge „Qazaq Air áýe kompanııasy satý týraly konkýrs nege ótpeı qaldy? Nege qaıtadan konkýrs jarııalandy?“ degen suraqtar jıi túsedi. Jańadan jarııalanǵan konkýrstyń qandaı aıyrmashylyǵy bar? Biz byltyr tamyzda „Qazaq Air“ áýe kompanııasyn satý týraly 2 kezeńnen turatyn ashyq konkýrs jarııaladyq. Degenmen konkýrs talaptaryna saı keletin ótinish túsken joq», — dedi Saltanat Sátjan «Samuryq-Qazyna» AQ qoǵamdyq keńes otyrysynda.

Onyń aıtýynsha, halyqaralyq ınvestorlar atalǵan áýe kompanııasyna qyzyǵýshylyq tanytqan.

«Sodan keıin konkýrstyń jańa talaptaryn ázirledik. Konkýrs qazir júrip jatyr. Jańa baıqaýdyń artyqshylyǵy — Qazaq Air áýe kompanııasynyń qaryzyn óteý merzimi ózgerdi. Búginde kompanııanyń 38 mlrd teńge qaryzy bar. Qarjyny áýe kompanııasy 5 ushaq alý úshin ulttyq qordan alǵan», — deıdi ol.

Sondaı-aq «Samuryq-Qazyna» AQ ókili qaryzdy 2044 jylǵa deıin óteý kerektigin aıtty.

Konkýrs 29 qańtarǵa deıin jalǵasady, oǵan kez kelgen ınvestor qatysa alady.