Qaıta qylmys jasaýǵa jol bermeý: «Probatsııa» is-sharasy qorytyndylandy

<p>ASTANA. KAZINFORM &ndash; QR Іshki ister mınıstrligi mamandary bıyl 15-22 tamyz aralyǵynda ótken &laquo;Probatsııa&raquo; jedel-profılaktıkalyq is-sharasynyń qorytyndysyn jarııalady.</p>

Kezekti reıd esepte turǵan adamdardyń jańa quqyq buzýshylyqtar jasaýynyń aldyn alýǵa, probatsııa qyzmetteri men polıtsııa bólimsheleriniń ózara is-qımylynyń tıimdiligin arttyrýǵa baǵyttalǵan.

Qylmystyq-atqarý júıesi komıtetiniń tóraǵasy Teńizjan Jánibekovtiń málimetinshe, elimiz boıynsha probatsııa qyzmetterinde esepte 28 myńnan astam adam turady. Olardyń basym bóligi – bas bostandyǵyn shekteýge sottalǵandar. Reıdtik is-sharaǵa kún saıyn QAJ departamenti men polıtsııa jeke quramynyń 6 myńnan astam qyzmetkeri jumyldyrylǵan.

«Reıd barysynda sottalǵandardyń qaıta qylmys jasaýǵa jol bermeý boıynsha profılaktıkalyq áńgimelesýler júrgizildi. Tekserýlerdiń qorytyndysy boıynsha izdeýde júrgen 10 adam anyqtaldy, olar – buryn probatsııa baqylaýynan jaltarǵandar», - dedi Teńizjan Jánibekov.

QAJ komıteti sottalǵandar arasyndaǵy quqyq buzýshylyqtardyń aldyn alý maqsatynda aǵymdaǵy jyldyń shildesinen bastap 2000-nan astam elektrondy baqylaý quraldaryn (bilezikter) jalǵa alǵan. Bilezikter sottalǵandardy qashyqtan baqylaýǵa jáne ornalasqan jeri týraly táýlik boıy aqparat alýǵa múmkindik beredi.

Bilezikterdi qoldaný arqyly 350 zań buzýshylyq anyqtalǵan. Tártipke baǵynbaǵandarǵa bas bostandyǵynan aıyrý jazasyn taǵaıyndaý úshin sotqa 87 materıal joldanǵan.

Aıta keteıik, túrmeden jazasyn ótep shyqqandardy jumysqa ornalastyrý boıynsha da jumystar jalǵasyp jatyr. Máselen, buǵan deıin Qyzylordada probatsııa esebindegi 52 azamat kvotamen jumysqa ornalasqanyn jazǵan edik.