Qaıta qarjylandyrý baǵdarlamasy sheńberinde bankterge 15810 ótinim berilgen
Onyń ishinde 62 mlrd. teńgeden astam somaǵa 10374 ótinim maquldanǵan. Ońtústik Qazaqstan oblysyna jumys sapary barysynda Qazaqstan Respýblıkasy Ulttyq bankiniń Tóraǵasy Danııar Aqyshev ıpotekalyq qaryzdardy qaıta qarjylandyrý baǵdarlamasynyń iske asyrylý barysy týraly osyndaı derekter keltirdi, dep habarlaıdy vedomstvonyń baspasóz qyzmetinen.
Ol ótinimderdi jınaýdyń jalǵasyp jatqanyn atap ótti. «Ulttyq bank bólingen qarajatty ıgerý qarqynyn ulǵaıtý úshin sharalar qabyldaýda. Ońtústik Qazaqstan oblysy boıynsha berilgen ótinimder sany - 1408. 4,3 mlrd. teńgege 1000 ótinim maquldandy», - dedi Ulttyq Bank basshysy.
Ulttyq bank basshysy «sońǵy ýaqyt ishinde Baǵdarlamaǵa tolyqtyrýlar men ózgerister engizilgenin» eske saldy, atap aıtqanda:
- áleýmettik turǵydan osal toptarǵa jatatyn qaryz alýshylardy memlekettik baj salyǵynyń somasyn tóleýden bosatýdy;
- problemalyq valıýtalyq qaryzdardy 2015 jylǵy 18 tamyzdaǵy baǵam boıynsha qaıta qarjylandyrýdy;
- turǵyn úı aýmaǵyna qoıylatyn talaptardy (jalpy aýmaǵy 120 sharshy metrden turǵyn aýmaǵy 120 sharshy metrge) ózgertýdi;
- úshinshi tulǵalardyń kepilimen qamtamasyz etilgen qaryzdardy qaıta qarjylandyrý múmkindigin engizilgenin;
- eger múlik qarjy uıymynyń balansyna qabyldanǵan bolsa, kredıtterdi qaıta qarjylandyrý múmkindigin kózdelgenin».
Sondaı-aq Ulttyq bank basshysy qazirgi ýaqytta Baǵdarlamanyń potentsıaldy qatysýshylaryn qamtýdy keńeıtýge baǵyttalǵan, Baǵdarlamaǵa jańa ózgerister toptamasy engizilip jatqanyn belgilep ótti.
Atap aıtqanda kelesiler josparlanýda:
1) PKQ salymyn bankterdiń ıgerý kezeńin 2016 jylǵy 1 jeltoqsanǵa deıin uzartý;
2) Baǵdarlamaǵa qatysýshy bankterdiń tizimin keńeıtý;
3) qaryz alýshy (birlesip qaryz alýshy) bolyp tabylmaıtyn kepil berýshi men onyń zaıyby (jubaıy) úshin 2015 jylǵy 1 qańtardaǵy jaǵdaı boıynsha jalǵyz baspanasy boıynsha shekteýdiń kúshin joıý;
4) 01.01.2015j. jaǵdaı boıynsha kepildi jyljymaıtyn múlikte eki otbasynan kóp otbasy músheleri (jaqyn týystar) turyp jatqan (resmı tirkelgen) qaryz alýshylar úshin turǵyn úı alańy boıynsha shekteýdiń kúshin joıý; Atap aıtqanda, turǵyn úı alańy boıynsha shekteýdiń kúshin joıý týraly sheshim Ońtústik Qazaqstan oblysynda oryn alǵan jaǵdaılar eskerile otyryp qabyldandy, munda jeke-turǵyn úı qurylysy damyǵan jáne úılerde birneshe urpaqtyń týysqan otbasylary turady.
5) Baǵdarlamanyń krıterııleri boıynsha turǵyn úı bolyp tabylmaıtyn (mysaly, kommertsııalyq jyljymaıtyn múlik, saıajaıdaǵy úı jáne t.b.), biraq qaryz alýshy men onyń otbasy naqty turatyn, qaryz alýshy men onyń zaıyby (jubaıy) úshin jalǵyz jyljymaıtyn múlik bolyp tabylatyn menshiginde jyljymaıtyn múligi bar qaryz alýshylardyń qaryzdaryn Baǵdarlamaǵa engizý;
6) Baǵdarlamaǵa menshiginde Baǵdarlamanyń krıterıılerine sáıkes keletin baspanadan basqa qosymsha «jeke turǵyn úı qurylysy» degen maqsattaǵy jer telimi bar qaryz alýshylardyń qaryzdaryn kirgizý;
7) Baǵdarlamaǵa shartty jasaý sátinde «múgedek balalary bar nemese olardy tárbıelep otyrǵan otbasylar» sanaty boıynsha HÁOT mártebesi bar, alaıda osy mártebeden 01.01.2015j. aıyrylǵan qaryz alýshylardy engizý;
8) Baǵdarlamaǵa HÁOT-ǵa jatqyzylǵan jáne 01.01.2015j. jaǵdaı boıynsha menshiginde Baǵdarlamanyń krıterıılerine sáıkes turǵyn úıi men jer ýchaskesinen basqa, qosymsha bir birlikten artyq emes kommertsııalyq jyljymaıtyn múligi bar qaryz alýshylardyń qaryzdaryn engizý;
9) bankterdiń qaryz alýshylardyń qaryzdaryn qaıta qarjylandyrýy týraly Komıssııanyń sheshimderine mindetti oryndalý sıpatyn berý».
Sonymen qatar Ulttyq bank qaryz alýshylarǵa kómektesý úshin oblystyq ákimdikpen jumysty jandandyrady.
«Kómek bankterde Ulttyq banktiń, ákimdik ókilderi men bankter basshylyǵynyń qatysýymen jeke kezdesýler uıymdastyrý, qaryzyn óteýge múmkindigi joq qaryz alýshylardy eńbekke ornalastyrý máselelerin qaraý arqyly kórsetiletin bolady», - dep túsindirdi Ulttyq bank basshysy.