Qaırat Tórebaev: Jyl sońyna deıin 5 saýda-ekonomıkalyq mıssııa ótkizemiz

ASTANA. QazAqparat – Bıyl ótkizilgen saýda-ekonomıkalyq mıssııalardyń qorytyndysynda 300 mln dollardan astam somaǵa eksporttyq kelisimsharttar rásimdeldi. Bul týraly Saýda jáne ıntegratsııa vıtse-mınıstri Qaırat Tórebaev málim etti, dep habarlaıdy QazAqparat tilshisi.

«Eksporttaýshylarǵa servıstik qoldaý saýda-ekonomıkalyq mıssııa ótkizýdi jáne halyqaralyq kórmelerde qazaqstandyq ónimderdiń ulttyq stendterin uıymdastyrýdy qamtıdy. 2023 jyldyń basynan beri Vetnam, Ázerbaıjan, Iran, Qytaı, Ózbekstan syndy elderde saýda-ekonomıkalyq mıssııa ótkizildi. Saýda-ekonomıkalyq mıssııalardyń qorytyndysynda 300 mln dollardan astam somaǵa eksporttyq kelisimsharttarǵa qol qoıyldy», - dedi ol Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, ótken aptada Qytaıdyń Sııan qalasynda ótken saýda-ekonomıkalyq mıssııa aıasynda atalǵan qaladaǵy elimizdiń bas konsýldyǵynda Qazaqstan taýarlaryna arnalǵan show-room ashyldy. Onda otandyq taýar óndirýshilerdiń ónimderi qoıylǵan

«Osy jyldyń sońyna deıin taǵy 5 saýda-ekonomıkalyq mıssııa ótkizý josparlanyp otyr. Sonymen qatar bıyl Shanhaı ımporttyq kórmesi, Qytaı-Eýrazııa 8-shi EKSPO syndy halyqzaralyq kórmelerde Qazaqstannyń ulttyq stendin uıymdastyrý josparlanǵan», - dedi vıtse-mınıstr.