Qaırat Seıtqazın: Abaıdyń shyǵarmalary – óshpes mura

KÓKShETAÝ. QazAqparat - Abaıdyń shyǵarmalary – óshpes mura. Bul týraly «Rýhanı jańǵyrý» óńirlik jobalyq keńsesiniń basshysy Qaırat Seıtqazın pikir bildirdi, dep habarlaıdy QazAqparat tilshisi oblystyq ishki saıasat basqarmasyna silteme jasap.

«Abaı shyǵarmalary – qazaq halqy úshin asyl mura. Órkenıetti eldiń rýhanııaty árdaıym aldyńǵy orynda bolý kerek. Ulttyq minezdi, ulttyq kodty saqtaǵan halyqtyń álem aldyndaǵy bedeli ústem. Ádebıetten sýsyndaǵan jas urpaqtyń jigeri myqty, talaby taýdaı bolyp, endi ónip jatqan jas butaqtaı búr jarary sózsiz.

Prezıdent Qasym-Jomart Toqaev ótken jyly Abaı Qunanbaıulynyń 175 jyldyq mereıtoıyn 2020 jyly joǵary deńgeıde merekeleý týraly jarlyqqa qol qoıǵan bolatyn. Endi kelgen jylda úlken bastamalar kóteriledi degen senimdemin. Sebebi, qazaqtyń bas aqyny esepteletin uly aqyny, kompozıtory, fılosofy, saıasatkeri, aǵartýshysy, qazaqtyń realıstik jańa jazba ádebıetiniń negizin qalaýshy Abaı Qunanbaevtyń muralaryn álemdik oqyrmanǵa shyǵaryp, sheteldiń kez kelgen jerinde maqtanyshpen kórsetýge bolady», - deıdi Q.Seıtqazın.

Osy rette, ol eski jyraýlar poezııasynan keıin qazaq dalasyna eýropashyl, jańa lepti ákelgen, qazirgi poezııanyń temirqazyǵyna aınalǵan aqynnyń óleńderi jalpyhalyqtyq sıpat alǵany qýantyp otyrǵanyn atap ótti.

«Danalyqtyń ólshemi bola bilgen fılosof-aqynnyń rýhanı murasy shyn mánisinde, kazaq halqynyń zerdeli oıy men ómiri turǵysyndaǵy entsıklopedııa sekildi. Abaıdy tanyp, belsendi ıgere otyryp, sol kezdegi kazaq qoǵamynyń ekonomıkalyq, saıası, kukyqtyq, otbasylyq, mádenı-tarıhı, moraldyq hal-jaıynan aıqyn da tolyk maǵlumattar alýǵa bolady», - dedi Q.Seıtqazın.

Sondaı-aq, ol naǵyz Rýhanı jańǵyrý Abaı murasynda ekenin atap ótti.

«Atap aıtqanda, Kókshetaý qalasynyń ákimi Amangeldi Smaılov málimdegendeı Kókshetaý qalasynda qazaqtyń uly oıshyly Abaı Qunanbaevqa eskertkish ornatylmaq. Kelip jetken jańa jyldy Abaıdyń murasymen bastasaq, mine, sol naǵyz Rýhanı jańǵyrý», - dep túıdi sózin.