Qaırat Satybaldyǵa qatysty tergeý tolyqqandy júrip jatyr - agenttik

NUR-SULTAN. QazAqparat – QR Sybaılas jemqorlyqqa qarsy is-qımyl agenttigi tóraǵasynyń orynbasary Ulan Sarqulov Qaırat Satybaldy men onyń burynǵy áıeli Gúlmıra Satybaldyǵa qatysty tergeý sharalary týraly aıtyp berdi, dep habarlaıdy QazAqparat tilshisi.

«Agenttikte qazir birqatar rezonanstyq ister qaralyp jatyr. Meniń túsinýimshe, Qaırat Satybaldyǵa da qatysty qylmystyq ister, kólik qyzmeti ortalyǵymen baılanysty jekelegen epızodtar bar. Bul ister qazir tergelýde, Qaırat Satybaldynyń burynǵy jubaıy Gúlmıra Satybaldyǵa da qatysty bólek tergeý júrip jatyr. Olar áli aıaqtalǵan joq. Belgili bir saraptamalar taǵaıyndaldy. Tergeý tolyqqandy júrip jatyr», - dedi U. Sarqulov Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, qylmystyq ister aıasynda jasyryn tergeý máselesi de bar.

«Qylmystyq is júrgizý zańnamasynda tergeý múddesi úshin jarııalaýǵa bolmaıtyny týraly tıisti baptar bar. Oǵan túsinistikpen qaraýdy suraımyz. Mundaǵy maqsat keıbir epızodtardy jasyrý nemese keıbir faktilerdi joıý emes, dálelderdi tolyq jınaý jáne bekitý úshin aldaǵy tergeý áreketterine zııan keltirmeý.

Ekinshi másele – azamattardyń konstıtýtsııalyq quqyqtary. Tergeý aıaqtalǵan joq. Protsestiń qatysýshylary retinde bizde ártúrli adamdar bar. Olardyń negizgi quqyqtyq aktilerde bekitilgen quqyqtaryn buzbaý úshin osyny aıtyp otyrmyz. Úshinshi másele – qylmystyq is júrgizý zańnamasynyń normalaryn eskere otyryp, biz ózge málimetterdi jarııalaǵanymyz úshin zań aldynda jaýap beremiz», - dedi Agenttik tóraǵasynyń orynbasary.

Aıta keteıik, Qaırat Satybaldy men Qaırat Boranbaevty tutqynda ustaý merzimi uzartyldy.

Budan buryn habarlanǵandaı, Sybaılas jemqorlyqqa qarsy qyzmet laýazymdyq ókilettikterin asyra paıdalaný jáne «Qazaqtelekom» AQ-nyń qarajatyn asa iri kólemde urlaý faktileri boıynsha qylmystyq isti tergep jatyr.

Bul qylmystardy jasady degen kúdikpen Qaırat Satybaldyuly ustalyp, ýaqytsha ustaý ızolıatoryna qamalǵan edi.