Qaırat Saq: Joldaýdyń mańyzdy tusy - halyqtyń ómir qaýipsizdigin qamtamasyz etý
«Joldaýdyń atap óterlik mańyzdy tustaryna kelsek, eń aldymen Elbasynyń halyqtyń ómir qaýipsizdigin basty nazarda ustaýdy talap etýi - óte ózekti másele. Prezıdenttiń ákimdikter men quzyrly organ basshylaryna bergen kezekti naqty tapsyrmasy halyqtyń jaǵdaıyn jasaýǵa baǵyttalyp otyr. Bıylǵy Joldaýdyń taǵy bir ereksheligi - jyldaǵy dástúrden bólek, ıaǵnı 3 aı buryn usynylýy. Bul degenimiz - tapsyrmalardy oryndaýǵa bıýdjet osy bastan qaralyp, kelesi jańa jyldan bastap quzyrly organdar iske kirisedi degen sóz. Joldaýdyń negizgi baǵyty - halyqtyń áleýmettik jaǵdaıyn kóterý, onyń ishine jumyspen qamtý, jalaqyny ósirý, bilim, densaýlyq - bári kiredi. Ózim qyzmet etetin joǵary bilim salasyna kelsek, Joldaýda aıtylǵan mamannyń sanyna emes, sapasyna mán berý jáne búgingi naryqtyń suranysyna qaraı maman daıyndaý isi - búgingi kúnniń ózekti máseleriniń biri», - deıdi L.E.Gýmılev atyndaǵy Eýrazııa ulttyq ýnıversıteti jýrnalıstıka jáne saıasattaný fakýltetiniń dekany Qaırat Saq.
Onyń aıtýynsha, joǵary bilim berýge qatysty Elbasy aıtqan basty syn - JOO básekelestikke tótep berýi jáne túlekterdiń ýnıversıtetti bitirgen soń jumyspen qamtamasyz etilýi.
«Bul turǵyda bizdiń Eýrazııa ulttyq ýnıversıtetinde arnaıy baǵdarlama bar jáne jyl saıyn túlekterimizdiń jumysqa turý jaǵdaıyna monıtorıng jasap otyramyz. Atap aıtsaq, biz jýrnalıstıka fakýlteti 1-kýrs stýdentteriniń bolashaqta BAQ-tyń qaı baǵyty boıynsha jumys istegisi keletinin anyqtap, sonyń negizinde BAQ quraldarymen baılanys jasap, tıisti mamandardy usynyp otyrmyz», - dedi ol.
Foto: shalkarfm.kz