Qaırat Mámı Sot ákimshiligi jónindegi halyqaralyq qaýymdastyq basshysymen kezdesti

ASTANA. QazAqparat - Konstıtýtsııalyq Keńestiń tóraǵasy Qaırat Mámı Sot ákimshiligi jónindegi halyqaralyq qaýymdastyqtyń Prezıdenti Mark Bıır myrzany qabyldady, dep habarlaıdy QazAqparat vedomstvonyń baspasóz qyzmetine silteme jasap.

Qazaqstandyq taraptan kezdesýge AHQO basqarýshysy Qaırat Kelimbetov te qatysty.

Kezdesý barysynda Konstıtýtsııalyq Keńestiń tóraǵasy sheteldik qonaqty Konstıtýtsııalyq Keńestiń Negizgi Zańnyń ústemdigin qamtamasyz etý jónindegi qyzmetimen, sondaı-aq 2017 jyly Qazaqstanda júrgizilgen konstıtýtsııalyq reformanyń negizgi, onyń ishinde «Astana» halyqaralyq qarjy ortalyǵyndaǵy erekshe quqyqtyq rejımge qatysty baǵyttarymen tanystyrdy.

Budan basqa, taraptar aǵymdaǵy jylǵy qyrkúıek aıynda Astana qalasynda Halyqaralyq Sýdıalar qaýymdastyǵy (HSQ) men Sot ákimshiligi jónindegi halyqaralyq qaýymdastyqtyń (SÁjHQ) birlesken forýmyn uıymdastyrý jáne ótkizý máselelerin talqylady.

Qazaqstan Sýdıalar odaǵy HSQ-qa 2004 jyly ekstraordınarlyq múshe retinde kirdi, al 2011 jyly osy bedeldi halyqaralyq qurylymnyń tolyqqandy múshesi boldy. 2016 jyldan bastap Qazaqstan SÁjHQ jumysyna qatysady.

Sheteldik qonaq ulttyq sot júıeleriniń aldynda turǵan jalpy mindetterdi sheshý úshin halyqaralyq sot qaýymdastyǵyn shoǵyrlandyrýǵa baǵyttalǵan SÁjHQ-nyń qyzmeti týraly habardar etti.

Qoryta kele, Qaırat Mámı sheteldik áriptesine Qazaqstanda júrgizilip jatqan quqyqtyq reformalarǵa úlken qyzyǵýshylyq tanytqany úshin alǵys aıtyp, quqyq ústemdigi qaǵıdattaryn bekitý salasyndaǵy yntymaqtastyqtyń tabysty jalǵasatynyna senim bildirdi.