Qaırat Mámı oblystyq sot tóraǵalarynyń salǵyrttyǵy úshin syn aıtty

ASTANA. QazAqparat - Joǵarǵy Sot tóraǵasy Qaırat Mámı óz óńirlerinde oryn alyp jatqan rezonanstyq isterge mán bermeıtin oblystyq sot tóraǵalaryna shúılikti, dep xabarlaıdy QazAqparat.

«Oblystyq sot tóraǵalaryna rezonanstyq jáne qoǵamdyq mańyzy joǵary isterge jiti mán berý tapsyrylǵan bolatyn. Biz osy saýaldy da arnaıy saraladyq. Ábdiqanov (Nurǵazy, Aqmola oblystyq sotynyń tóraǵasy), Abdýllaev (Sáken, Áskerı sot tóraǵasy), Qaıyrbekov (Nurlan, Qyzylorda oblystyq sotynyń tóraǵasy), Merǵalıev (Aslambek, Qostanaı oblystyq soty), Taımerdenov (Meırambek, Almaty oblystyq sotynyń tóraǵasy), Sháripov (Nurserik, Ońtústik Qazaqstan oblystyq sotynyń tóraǵasy) bular appelıatsııalyq sot otyrystaryndaǵy ister jóninde esep bermedi. Merǵalıev pen Ámetov (BQO sotynyń tóraǵasy) tóraǵa retinde tek 10 iske qatysqan», - dedi Q. Mámı.

Onyń eske salýynsha, oblystyq sot tóraǵalarynyń isti qaraý barysyndaǵy jumysbastylyǵy sońǵy jyldary edáýir jeńildetilgen. Kassatsııalyq ınstantsııalardy ońtaılandyrý barysynda appelıatsııalyq sot qatary 104 birlikke ulǵaıtyldy.

«Mysaly, men sizderge Joǵarǵy Sot qaramaıtyn isterge nazar aýdaryp otyrýdy eskertkenmin. Oblystyq sot tóraǵalaryn ondaı isterdi jeke qarap, tóraǵalyq etýin tapsyrǵanmyn. Soǵan qaramastan, meniń usynysymmen byltyr oblystyq sottar nazarynan tas qaldyryp alǵan onnan astam is qaıta qaraýǵa jiberildi», - dedi Joǵarǵy Sot basshysy.