Qaırat Mámı Qaraǵandy oblystyq sotynyń jumysyn synǵa aldy
Qaraǵandy oblysy sottarynyń qyzmetin zerdeleý nátıjesin Joǵarǵy Sottyń Qylmystyq ister boıynsha sot alqasynyń tóraǵasy, kóshpeli komıssııa boıynsha jumys tobyn basqarǵan A.Rahmetýlın tanystyrdy. Esepti kezeńde ister sanynyń artýy baıqalady. Sottar shamamen 5,5 myń qylmystyq isti qaraǵan, sottarǵa 101 myńnyń shamasynda azamattyq is pen 33 myńnan astam ákimshilik is kelip túsken. Jańa quqyqtyq jaǵdaılardaǵy sottar jumysyn taldaý, sonyń ishinde, jeńildetip is júrgizýdi keńeıtý, medıatsııa qoldaný arqyly qylmystyq jáne azamattyq sot isin júrgizý tıimdiliginiń artqanyn kórsetti.
«Deı turǵanmen, oblys sottarynda birqatar túıtkildi máseleler de joq emes. Atap aıtqanda, bularǵa sot aktilerin ázirleý barysyndaǵy kemshilikter men olardyń ýaqtyly oryndalmaýy jatady. Sot talqylaýyna daıyndyqtyń tıisti deńgeıde júrgizilmeýi saldarynan qylmystyq isterdi qaraý merzimderin buzý faktileri anyqtaldy. Azamattardyń ótinishterine jaýapty keshiktirip berý, muraǵat jumysy sapasynyń tómendigi, sondaı-aq, birqatar aýdandyq sottar ǵımarattary jaǵdaıynyń tómendigi sekildi jaǵymsyz jaıttar da bar», - delingen aqparatta.
Otyrysty ótkizý barysynda Joǵarǵy Sot Tóraǵasy Qaraǵandy oblysyna sapar barysynda buıryqtyq is júrgizý, apellıatsııalyq saty jumysy, sondaı-aq, jekelegen sot praktıkasynyń birqatar máseleleri boıynsha anyqtalǵan synı eskertpelerdi atap ótti.
Talqylaý qorytyndysy boıynsha tóralqa tıisti qaýly qabyldady. Jalpy alǵanda, Shyǵys Qazaqstan jáne Qaraǵandy oblystaryndaǵy sot tóreligin júzege asyrý boıynsha sottardyń jumysy qanaǵattanarlyq dep tanyldy. Oblystyq sotardyń tóraǵalaryna, alqa tóraǵalary men sottar ákimshilerine anyqtalǵan kemshilikterdi joıý boıynsha júıeler sharalardy qabyldaý qajettigi aıtyldy.