Qaırat Mámı BAQ ókilderin kásibı merekelerimen quttyqtady
Atalǵan is-shara olardyń kásibı merekesi - Baılanys jáne aqparat qyzmetkerleri kúni qarsańynda uıymdastyryldy.
«Atalǵan mereke Qazaqstan qoǵamy úshin árqashan zor mańyzǵa ıe. Bul kúnderi respýblıkamyzda túrli saltanatty jáne merekelik is-sharalar ótkizilýde. Mundaı yqylas buqaralyq aqparat quraldarynyń qazirgi Qazaqstan qoǵamynyń ómirinde alar aıryqsha rólin aıqyndaýmen qatar, olardyń zor suranys pen qurmetke ıe ekendigin dáleldeıdi», - dedi Qaırat Mámı.
Joǵarǵy Sot Tóraǵasy 2013 jylǵy qarashada ótken Sýdıalardyń altynshy sezinde bergen Memleket basshysynyń tapsyrmalaryn iske asyrý maqsatynda sot júıesin jańǵyrtý baǵytynda atqarylyp jatqan jumystar týraly baıandady. Osy rette ol qylmystyq, ákimshilik jáne azamattyq-quqyqtyq salalardaǵy zańnamany jetildirý jumystarynyń aıaqtalýǵa jaqyn qalǵandyǵyna aıryqsha toqtaldy. Sot júıesiniń táýelsizdigi ındeksin arttyrý jónindegi Jol kartasy ázirlendi. Sot júıesiniń óz ishinde sýdıalarǵa negizsiz yqpal etýdi joıýǵa múmkindik beretin sot qyzmetine monıtorıng júrgizýdiń jańa ádistemesi qabyldandy. Elektrondy sot isin júrgizý jappaı qarqyndy damýda. Halyq úshin sot tóreliginiń ashyqtyǵy men qoljetimdiligin arttyrý maqsatynda Sot júıesin aqparattandyrý tujyrymdamasy ázirlendi. Sotqa deıingi medıatsııa jáne daýlardy sheshýdiń (aralyq sottar) balamaly joldary tájirıbege keńinen engizilýde.
Buqaralyq aqparat quraldarymen ózara baılanys deńgeıin odan ári arttyrý - sot júıesiniń aldaǵy kezeńdegi damýynyń negizgi basymdyqtarynyń biri.
Buqaralyq aqparat quraldarynyń qoǵam ómirindegi alatyn mańyzdylyǵyn aıta kele, Qaırat Mámı kezdesýge qatysýshylarǵa sot bıliginiń ımıdjin nyǵaıtýǵa qosqan úlesteri jáne kórsetken aqparattyq qoldaýy úshin alǵys bildirip, olarǵa Qurmet gramotalary men estelik syılyqtar tabystady.