Qaırat Mámı: Ákimshilik is júrgizý kodeksiniń jańa jobasy aqpanda tanystyrylady

ASTANA. QazAqparat - QR Joǵarǵy Sotynyń Tóraǵasy Qaırat Mámı «Vremıa» gazetine bergen suhbatynda Azamattyq is júrgizý jáne Ákimshilik is júrgizý kodeksteriniń jańa redaktsııasy ázirlenip jatqanyn aıtty.

Azamattyq is júrgizý kodeksine (AІJK) engiziletin jańa tártip qatysýshylarǵa isterdi qaraý rásiminiń qolaıly úrdisin, bitimge kelý rásimderin keńinen qoldaný, zamanaýı elektrondyq tehnologııalardy paıdalanýdy kózdeıdi.

Tutastaı jańa AІJK qabyldaýdy qalpyna keltirilgen sot ádildigine kóshýmen baılanystyramyz, ıaǵnı sot pen taraptar pragmatıkalyq jáne ymyraly tásilderdi kórsetip, ádil, ózara tıimdi sheshimge umtylady.

AІJK aıasynda Joǵarǵy Sotta ınvestıtsııalyq daýlardy qaraıtyn alqa qurý jáne Astana qalasy sotynyń mamandandyrylǵan quramyn jasaqtaý qarastyrylady.

Bul shara ınvestordyń qatysýymen bolatyn daýlarda sottyń sońǵy sheshim shyǵarýyna ýaqytty edáýir qysqartýǵa, barynsha joǵary kásibı deńgeıde birtekti sot praktıkasyn qamtamasyz etýge, sondaı-aq óńirlik múddelerge, ásirese qorshaǵan ortany qorǵaýmen baılanysty ózekti ister boıynsha zańsyz yqpaldyń áleýetti múmkindigin alyp tastaýǵa jaǵdaı týǵyzady.

AІJK jobasyn ázirleý jarııa túrde ótti, barlyq múddeli qurylymdar men memlekettik organdardyń pikirleri eskerildi. Onyń sońǵy redaktsııasyn halyqaralyq quqyq qorǵaýshy ÚEU - «Ádil sóz», «Internıýs» halyqaralyq sóz bostandyǵyn qorǵaý qorlary qoldady.

Ákimshilik is júrgizý kodeksiniń (ÁІJK) jobasyn ázirleýge qatysty aıtar bolsaq, birinshi kezekte, bul jarııa-quqyqtyq sıpattaǵy daýlardy sheshý tártibin protsessýaldyq jekeleýge, reglamentteýge múmkindik beredi.

AІJK jobasyna azamattyq is júrgizý zańynan jeke tulǵalar men jarııa ákimshilik arasyndaǵy daýlardy qaraýdy reglamentteıtin quqyqtyq normalardy engizý josparlanýda. Bular negizinen memlekettik bılik, ózin-ózi basqarý organdarynyń, laýazymdy tulǵalar men memlekettik qyzmetshilerdiń sheshimderi men is-áreketteriniń (nemese áreketsizdikterin) daý-damaıy týraly máseleler.

Jańa redaktsııadaǵy AІJK men ÁІJK jobalary boıynsha jumys qazir belsendi júrip jatyr. Parlament Májilisiniń depýtattarymen birlesip AІJK jobasyn talqylaý boıynsha óńirlerde birqatar is-sharalar josparlandy.

ÁІJK jobasyn Joǵarǵy sot jaqyn arada tanystyrady. Onyń mátini saıtqa ornalastyrylady. Bul jaıynda BAQ arqyly habarlaıtyn bolamyz,- dep atap ótti Q. Mámı.