Qaırat Qudaıbergen men «Dıkıı Armanǵa» raqymshylyq jasala ma - Bas prokýratýra jaýaby

ASTANA. QazAqparat – Qańtar oqıǵasy boıynsha 20-ǵa jýyq adam jappaı tártipsizdikti uıymdastyrýshy retinde kúdikke ilindi. Bul týraly Bas prokýrordyń orynbasary Áset Shyndalıev aıtty, dep habarlaıdy QazAqparat tilshisi.

Búgin Senatta ótken baspasóz máslıhatynda tilshiler Bas prokýrordyń orynbasarynan qańtar oqıǵasyn uıymdastyrýshylar sanatyna kimder jatatynyn, sondaı-aq Qaırat Qudaıbergen (kásipker) men «Dıkıı Arman» laqap atymen tanymal Arman Jumageldıevtiń osy sanatqa qatystylyǵyn surady.

«Bizde jalpy 20 shaqty adamnyń áreketi (qańtar oqıǵasy kezinde) jappaı tártipsizdikti uıymdastyrýshy retinde qylmystary saralanǵan. Olarǵa raqymshylyq jasalmaıdy, tek qatysýshylar raqymshylyqqa iligedi.

Qańtar oqıǵasynda qylmys jasaǵandardyń basym bóligi qatysýshylar bolyp sanalady. Olardyń sany shamamen 700 adam. Olardyń bárine raqymshylyq jasalady, al jappaı tártipsizdik uıymdastyrǵan 20 adam raqymshylyqqa ilinbeıdi», - dedi Áset Shyndalıev.

Osy oraıda ol Qaırat Qudaıbergenge uıymdastyrýshy aıyby taǵylǵanyn naqtylady.

Budan buryn habarlanǵandaı, Qaırat Qudaıbergen Almaty oqıǵasy kezinde jappaı tártipsizdikterdi uıymdastyrdy jáne oǵan qatysty degen kúdikpen ustaldy.

Al 7 qańtarda Almatyda polıtseıler «Dıkıı Arman» laqap atymen tanymal qylmys áleminiń serkesi Arman Jumageldıevti ustady.