Qaırat Qojamjarov Ulttyq qorǵanys ýnıversıtetinde boldy
Sapar barysynda ýnıversıtettiń professor-oqytýshylar quramymen, doktoranttar jáne magıstranttarmen, sondaı-aq Qorǵanys mınıstrliginiń, ýnıversıtettiń jáne Áskerı-ǵarysh baǵdarlamalar ortalyǵynyń basshylyǵymen kezdesý boldy.
Senator óz sózinde Memleket basshysynyń Joldaýyndaǵy birneshe ózekti bastamalardy atap ótti. Kezdesýde ýnıversıtettiń ınfraqurylym nysandarynyń qurylysyndaǵy ózekti máseleler qozǵaldy, memlekettik tildegi áskerı-ǵylymı oqý ádebıetiniń joqtyǵy, ýnıversıtettiń zerthanalary men kafedralaryn zamanaýı kompıýterlik tehnıkamen zamanaýı baǵdarlamalyq ónimdermen ýaqtyly qamtamasyz etý máseleleri, sondaı-aq materıaldyq-tehnıkalyq jaraqtandyrý men oqý protsesiniń basqa da máseleleri atap ótildi.
«Áskerı kadrlardy daıarlaý jónindegi qazirgi zamanǵy júıeniń ıkemdi jáne tıimdi bolýy, búgingi zamanǵy qaýip-qaterge jaýap beretin, áskerı ónerdi damytý úrdisteri men jańa kezeńdegi soǵys túrlerin boljaı alatyn bolýy tıis» , - dep atap ótti senator.
Senator áskerı qyzmetshilerdiń qyzmetin zańnamalyq qamtamasyz etý, jalpy áskerı qyzmet, turǵyn úı qatynastary máselelerine, sondaı-aq arnaıy operatsııalar men tótenshe jaǵdaılar kezinde quqyq qorǵaý jáne arnaıy organdardyń laýazymdy adamdarynyń is-qımyldaryn zańnamalyq deńgeıde bekitý qajettigine toqtaldy.
Kezdesýde sondaı-aq zańnamadaǵy jańalyqtar, atap aıtqanda Senatta qaralǵan «Áskerı qyzmet jáne áskerı qyzmetshilerdiń mártebesi týraly» QR Zańyna engiziletin ózgeristerdiń negizgi erejeleri týraly pikir almasyldy.
Qaırat Qojamjarov kezdesý sońynda ýnıversıtettiń barlyq professorlyq-oqytýshylyq quramyna ǵylymı qyzmetteriniń tabysty bolýyna tilektestin bildirdi.