Qaırat Qojamjarov prokýrorlarǵa qoıylatyn negizgi talaptardy atady

ASTANA. QazAqparat - Zańsyz úkimderdiń kúshine ený faktileri tómendedi. Bul týraly Bas prokýratýrada qyzmetti jetildirý perspektıvalary jáne prokýratýra organdaryndaǵy ózekti máselelerdi talqylaýǵa arnalǵan konferentsııada málim boldy, dep habarlaıdy QazAqparat.

Bas prokýror Qaırat Qojamjarov sot tóreligin júzege asyrý júıesindegi memlekettik aıyptaýshylar ınstıtýtynyń erekshe rólin jáne prokýrorlardyń adam taǵdyrymen baılanysty joǵary jaýapkershiligin atap ótti.

«Jyl saıyn prokýrorlar birinshi satydaǵy sottarda 40 myń is boıynsha aıyptaýdy qoldaıdy. Joǵarǵy sotpen birlesken sharalardyń nátıjesinde zańsyz úkimderdiń kúshine ený faktileri tómendedi. Ótken jyly qadaǵalaý aktileri boıynsha barlyǵy 1945 adamǵa qatysty sot sheshimderiniń kúshi joıylyp, ózgertildi. Bul kórsetkish 2017 jylmen salystyrǵanda 54 paıyzǵa (1263) artyq. Bas prokýrordyń narazylyǵy negizinde Joǵarǵy sotta 443 adamǵa qatysty sot aktileri túzetildi, sonyń ishinde 334 sottalǵan adamnyń jaǵdaıy jaqsartylyp, 35 adam aqtaldy», - delingen Bas prokýratýra baspasóz qyzmetiniń málimetinde.

Qaırat Qojamjarov óz sózinde prokýrorlar sáıkes kelýi tıis standarttarǵa nazar aýdardy.

«Memlekettik aıyptaýshy kásibı bilikti bolýǵa mindetti jáne zańdy tereń meńgerýi tıis. Dáleldemelerdi baǵalaý kezinde jalǵyz durys baǵytty ustana bilýi kerek. Ol - jazanyń bultartpastyǵynyń kepili, al kinásizdi anyqtaǵanda, onyń quqyǵyn qorǵaýy qajet», - dedi ol.

Sondyqtan da prokýrorlardyń kásibı deńgeıin arttyrý maqsatynda Bas prokýratýra janyndaǵy Akademııa memlekettik aıyptaýshylardy oqytýdyń jańa baǵdarlamasy men ádistemesin ázirledi.

Aıta keteıik, konferentsııaǵa Prezıdent Ákimshiligi, Joǵarǵy sottyń ókilderi, sondaı-aq óńirlik prokýratýra qyzmetkerleri qatysty.