Qaırat Qojamjarov monopolısterdi tekserý nátıjesiniń jaǵa ustatarlyq derekterin jarııalady

ASTANA. QazAqparat - QR Bas prokýrory Qaırat Qojamjarov tabıǵı monopolııalar sýbektileri jumysyna júrgizilgen aýqymdy tekserýdiń nátıjesin jarııa etti, dep habarlaıdy QazAqparat tilshisi.

«Monopolısterdiń resmı esep-qısaby boıynsha óndiristik kórsetkishterdi jaqsartý boıynsha shyǵyndarǵa 1 trln teńge alynǵan. Biraq, is júzinde qural-jabdyqtardyń tozýy joǵary deńgeıde qalyp otyr. Túrli baǵalaýǵa sáıkes el boıynsha tozý deńgeıi 63 ten 54 paıyzǵa deıin quraıdy. Osy ýaqytta Almaty JES-iniń tozýy 70 paıyzǵa deıin, Qapshaǵaı men Ekibastuz JES-iniń tozýy 79 paıyzǵa deıin jetip otyr», - dedi ol búgin QR Qaýipsizdik keńesiniń otyrysynda.

Onyń aıtýynsha, 2016 jyly «ınvestıtsııanyń ornyna tarıf» baǵdarlamasy aıaqtalǵannan keıin tarıftiń kútilgen tómendeýi oryn alǵan joq.

«Óndirýshiler qazaqstandyqtarǵa energııany qosarlanǵan stavkamen, ıaǵnı, burynǵy joǵary tarıfpen jetkizýin jalǵastyra berdi. Olardyń tek 15 ǵana tekserý artyq kiristiń 51,5 mlrd teńgeden asyp jyǵylǵanyn anyqtady. Energııa qýaty boıynsha múldem ártúrli kompanııalar úshin birdeı shekti tarıf zańsyz bekitilgen. Ózindik quny tómen energııa óndiretin kásiporyndar  shyǵyn joǵary óndirýshiler tobymen zańsyz birikken», - dedi Qaırat Qojamjarov.

Onyń aıtýynsha, elimizdiń Energetıka mınıstrligi energııa óndiretin kásiporyndardy jańǵyrtý baǵdarlamasynyń tıimdiligin baǵalamaǵan, monıtorıng júrgizbegen. Monopolıster usynǵan esep-qısaptyń durystyǵyn teksermegen.

«Joǵarylatylǵan tarıfti bekitý týraly sheshim halyqtyń múddesine shyǵyn keltire otyra olardyń shyǵystarynyń qysqarǵandyǵyn eskermesten qabyldanǵan. Sondyqtan biz  Energetıka mınıstrliginiń zańsyz buıryqtaryna narazylyq engizdik. Qazir olar qaralý satysynda», - dedi Bas prokýror.