Qaırat Qojamjarov alty orynbasarynyń ekeýi ǵana qalǵanyn aıtty

ASTANA. QazAqparat - Memlekettik qyzmet isteri reformasynda basqarý deńgeıi jeti esege deıin qysqarady. Búgin Májiliste QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov málim etti.

Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik basqarý júıesin odan ári jetildirý máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.

Jıyn barysynda depýtat Tursynbek Ómirzaqov Úkimettik organdardy qaıta qurylymdaýdyń tıimdiligi týraly surady.

«Memlekettik qyzmet isteri salasyndaǵy basqarý júıesindegi kedergiler, sheshimderdiń qandaı deńgeıde qabyldanatyny týraly Elbasy jetkilikti aıtty. Men oblys ákimi qyzmetinde bolǵanda da mundaı másele kezdesip turatyn. Sondyqtan da, biz reforma arqyly basqarýshylyq satylardy jeti esege deıin qysqartamyz. Máselen, búgin meniń eki orynbasarym bar, al buryn eki agenttikti qosa alǵanda alty orynbasar bolatyn. Derbes basqarýdaǵy jıyrma shaqty departamentten úsheýi ǵana qalyp otyr»,- dedi Qaırat Qojamjarov.

Onyń aıtýynsha, memlekettik organdar úshin eń bastysy nátıjeniń tıimdiligi bolýy shart.