«Qaırat» elordada «Astanany» jeńip ketti

ASTANA. QazAqparat - Fýtboldan Premer-lıga komandalary arasyndaǵy el birinshiliginiń 6-týrynda «Qaırat» «Astanany» jeńip ketti, dep habarlaıdy QazAqparat tilshisi.

Altynshy týrdaǵy taǵy bir kezdesý elordada «Astana» men Almatynyń «Qaıraty» arasynda ótti.

Jankúıerler eki komanda kezdesýin asyǵa kútedi. Elimizdiń eki iri qalasynyń klýbtary jylma-jyl osylaısha ózara básekege túsip jatady.

Bıylǵy birinshilikte «Astana» komanda quramyn kúsheıtse, «Qaırat» negizinen óz akademııasynda tárbıelenip shyqqan jastarǵa úmit artyp otyr.

Kezdesý barysynda almatylyq klýb jyldam gol soǵyp ketti. Elordalyq qorǵaýshylar qateligin paıdalanyp ketken Joao Paolo 3-mınýtta almatylyq klýbty alǵa shyǵardy. Alań ıeleri tarazy basyn teńestirýge umtyldy. Soǵan qaramastan tablodaǵy esep ózgerissiz qaldy.

Ekinshi kezeńde elordalyq klýb oıynshylary gol soǵýǵa umtyldy. Esesine 55-mınýtta Joao Paolo «Qaırattyń» basymdyǵyn arttyrdy. Al almatylyq klýbtan Dmıtrıı Sergeev 86-mınýtta qorytyndy esepti belgiledi.

Osylaısha «Qaırat» syrt alańda «Astanany» 3:0 esebimen basym tústi.

Endi atalǵan týrda «Ordabasy» men «Tobyl» komandalary oınap jatyr.

Atalǵan týrda búgin «Qyzyljar» «Aqsýdy» 2:0, «Aqtóbe» «Atyraýdy» 4:0 esebimen tize búktirdi.

Eske salsaq, 15 sáýirde «Qaısar» «Jetisýdan» 2:0 esebimen basym tússe, «Kaspıı» «Oqjetpesti» 2:1, «Shahter» «Maqtaraldy» 3:0 esebimen jeńdi.