«Qaırat» elıtalyq kezeńde alǵash ret jeńiske jetti — fýtzal

<p>ASTANA. KAZINFORM &mdash; Fýtzaldan Chempıondar lıgasynyń elıtalyq kezeńinde &laquo;Qaırat&raquo; komandasy Zagreb qalasynda (Horvatııa) frantsııalyq &laquo;Etýalmen&raquo; sheberlik baıqasty.</p>

Bul osyǵan deıin óz tarıhynda eki márte Chempıondar lıgasyn utqan almatylyq klýbtyń V tobyndaǵy alǵashqy oıyny edi.

Birinshi taımda ıspanııalyq maman Marlon Velasko jattyqtyratyn «Qaırattyń» (kapıtany Birjan Orazov) oıynshylary birden shabýylǵa shyqty. 2-mınýtta ádemi uıymdastyrylǵan shabýyldan keıin Edsonnyń pasynan soń Dener Rodrıgo esep ashty. 9-mınýtta Edsonnyń ózi esepti 2:0-ge jetkizdi.

Ekinshi kezeńde 26-mınýtta «Etýal» sapynan Sýfıan El-Mesrar kózge tústi. Degenmen 31-mınýtta Jýlıo Zanotto qaqyrata tepken dop qaqpada týlap jatty — 3:1. 37-mınýtta «Qaırat» oıynshylarynyń qateligin Abdessamad Mohammed paıdalanǵanymen, Kevın Arrıeta qarymta gol soqty — 4:2.

Osylaısha, «Qaırat» elıtalyq kezeńde alǵashqy jeńisine qol jetkizdi.

Ár toptan tek jeńimpaz komanda ǵana jartylaı fınalǵa shyǵatynyn eskersek, almatylyqtarǵa qalǵan eki oıynda da nátıjeli óner kórsetý kerek-aq.

Eske sala keteıik, budan buryn fýtzaldan Chempıondar lıgasynda «Qaırat» pen «Semeıdiń» elıtalyq kezeńdegi alǵashqy matchtaryn ótkizetinin jazǵan bolatynbyz.

Fýtzaldan Chempıondar lıgasynda «Semeı» elıtalyq kezeńde utylyp qaldy.