Qaırat Boranbaevtyń qashan bosatylatyny naqtylandy

<p>Jazasy jeńildetilgen kásipker Qaırat Boranbaev jaqyn arada bostandyqqa shyǵady. Bul týraly Bas prokýrordyń orynbasary Áset Shyndalıev aıtty, dep habarlaıdy Kazinform.</p>

Búgin Senattyń jalpy otyrysynan keıin tilshiler Qaırat Boranbaevtyń bostandyqqa qashan shyǵatynyn surady.

«Osyǵan deıin sot sheshimi shyqty. Sot sheshimi zańdy kúshine engen kezde bosatylady. Jalpy, 15 kúndeı kútý kerek. Qatelespesem, tıisti sheshim bir apta buryn qabyldandy. Sondyqtan endi bir aptadan keıin ol shyǵýy múmkin», - dedi Áset Shyndalıev.

Eske salaıyq, jýyrda belgili kásipker Qaırat Boranbaev isi boıynsha apellıatsııalyq sot úkimi shyqty. Sot kásipkerdiń jazasyn jeńildetti. Ol 6 jylǵa bas bostandyǵynan aıyryldy.

Budan buryn habarlanǵandaı, 20 qazanda belgili kásipker Qaırat Boranbaevtyń jazasy jeńildetildetilgeni jarııalandy. 

«Sot sottalýshy «B.»-nyń ótinishin qanaǵattandyra otyryp, jazanyń qalǵan bóligin bostandyqty shekteý túrine aýystyrdy» delingen Aqmola oblysy Zerendi aýdandyq sotynyń habarlamasynda.

Eske salsaq, bıyl naýryz aıynda sot sheshimimen Qaırat Boranbaevqa 8 jylǵa bas bostandyǵynan aıyrý jazasy taǵaıyndaldy.

Keıin sotta bul úkim qaıta qaralyp, múlkin tárkileý jáne jazany eki jylǵa qysqartý belgilendi.