Qaırat Boranbaev memlekettik nagradalardy keri qaıtarady, múlki tárkilenedi - sot úkimi

ASTANA. QazAqparat – Sot úkiminde Qaırat Boranbaevqa taǵaıyndalǵan memlekettik nagradalardy keri qaıtarý týraly aıtylǵan, dep habarlaıdy QazAqparat tilshisi.

«Qylmystyq kodekstiń 49-baby 2-bóligine sáıkes Qaırat Boranbaevty memlekettik nagradalardan aıyrý týraly usynys engizilsin», - dedi úkimdi oqyǵan sýdıa Nazgúl Bapaqova.

Qaırat Boranbaevqa berilgen memlekettik nagradalar qatarynda «Qurmet», «Eren eńbegi úshin», «Parasat» jáne ІІІ dárejeli «Barys» ordeni bar.

«Memleket múddesine Q. Boranbaevtyń ál-Farabı kóshesindegi (Almaty qalasy) úı-jaı men jer ýchaskesi, «Qazaqstan Halyq banki» AQ shotyndaǵy 1 mlrd 270 mln 190 myń teńge somasyndaǵy qarajat tárkilensin. Sonymen qatar, «Qazaqstan Halyq banki» AQ-daǵy eki shotqa bólinip salynǵan 2 mlrd 847 mln 877 myń 603 teńge de tárkilensin. Atalǵan shottaǵy qalǵan somaǵa arest qoıylsyn», - deıdi sýdıa.

Buǵan deıin Qaırat Boranbaevqa 8 jylǵa bas bostandyǵynan aıyrý jazasy taǵaıyndalǵany týraly habarlaǵan edik.

Eske salsaq, ótken jyly 17 naýryzda sottyń sheshimimen Qaırat Boranbaev 2 aıǵa qamalǵan edi. Keıin Qaırat Satybaldy men Qaırat Boranbaevtyń syrtqa zańsyz shyǵarylǵan aktıvteri qaıtaryla bastaǵany habarlandy.

Aıta ketsek, Astanada Qaırat Boranbaevqa qatysty sot otyrysy byltyr 30 jeltoqsanda bastaldy.

28 naýryzda ótken sot otyrysynda prokýror Qaırat Boranbaevty 8 jylǵa bas bostandyǵynan aıyryp, múlkin tárkileýdi surady.

Búgin túske deıin Qaırat Boranbaev sot aldyndaǵy sońǵy sózin aıtqan edi.