Qaırat Balabıev: Ulytaý oblysyn qurý – babalar rýhyna kórsetilgen taǵzym ári ádil baǵa
«Memleket basshysy Qasym-Jomart Toqaev Prezıdenttiń ókilettigin birtindep qysqarta otyryp, Parlamenttiń rólin arttyrý qajettigin atady. Ásirese, tómengi palata Májilistiń ókilettigin keńeıtip, zań shyǵarý quqyǵyn ıelený máselesin júzege asyrýdy tapsyrdy. Odan bólek, azamattardyń ókildi bılikke degen senimin nyǵaıtý úshin máslıhattarǵa basa mán berý qajettigin, olardyń rólin arttyryp, derbestigin qamtamasyz etý úshin máslıhat tóraǵasy laýazymyn engizýdi jáne máslıhattardyń oblys ákimderin taǵaıyndaý tártibine ózgerister engizýdi tapsyrdy. Óz kezeginde, bul ózgeristerdiń máslıhattardyń yqpalyn kúsheıtýge, memleketimizdiń ınstıtýtsıonaldyq tuǵyryn nyǵaıtýǵa qosar úlesi mol bolary sózsiz», - deıdi ol.
Q.Balabıevtiń aıtýynsha, Memleket basshysy halyqtyń usynystaryn eskere otyryp, jergilikti turǵyndardyń memlekettik qyzmet alý sapasyn joǵarylatý jáne olardyń áleýmettik jaǵdaıyn kóterý maqsatynda Semeı aımaǵynda Abaı oblysyn qurýdy, onyń ortalyǵy etip Semeı qalasyn belgileýdi usyndy.
«Uly aqyn, aǵartýshy, qazaqtyń jazba ádebıetiniń jáne ádebı tiliniń negizin salýshy, oıshyl, saıası qaıratker – Abaı Qunanbaıuly elimizdiń tarıhynda úlken iz qaldyrǵan adam. Ol ádebıettiń damýyna ǵana emes, sonymen birge Qazaqstan, Reseı jáne basqa da Eýropa elderi arasyndaǵy mádenı baılanystardy nyǵaıtýǵa úles qosqan. Abaıdyń qurmetine atalǵan kósheler Qazaqstanda ǵana emes, Kıevte, Tashkentte, Delıde, Kaırde jáne tipti Berlınde de bar. Sondyqtan, Abaı oblysyn qurý óte oryndy sheshim dep bilemin», - deıdi Qaırat Rahymuly.
Sonymen qatar, Prezıdent burynǵy Jezqazǵan oblysynyń aýmaǵynda Ulytaý oblysyn quryp, Jezqazǵan qalasy qaıtadan oblys ortalyǵy bolatynyn aıtty. Prezıdent bul sheshimderdiń tek ekonomıkalyq emes, rýhanı jaǵynan da mańyzdy ekendigin jetkizdi.
«Úsh júzdiń basyn qosqan Ulytaý – qazaq halqynyń tarıhı ortalyǵy. Dalalyq órkenıet kóne mádenıetiniń naq kindigi. Ulytaýda Joshy han men túrkitildes taıpalardyń negizin qalaýshylardyń biri Alasha hanǵa keseneler kóterilip, esimderi Altaı, Oral, Qyrym, Soltústik Kavkaz jáne Ózbekstannyń halyq aýyz shyǵarmashylyǵynda máńgilik saqtalǵan Altyn Ordanyń hany Toqtamys, Ordalyq uly qolbasshy, ámir Edige de osynda jerlengen. Sondyqtan, Ulytaý oblysyn qurý – babalar rýhyna kórsetilgen taǵzym ári ádil baǵa dep oılaımyn», - deıdi ol.