Qaırat Ábdirahmanov: TúrkPA - túrkitildes elder ıntegratsııasynyń negizi

ASTANA. QazAqparat - Syrtqy ister mınıstri Qaırat Ábdirahmanov TúrkPA jáne Túrki akademııasynyń basshylarymen kezdesti, dep habarlaıdy QazAqparat SІM baspasóz qyzmetine silteme jasap.    

Ústimizdegi jylǵy qyrkúıek aıynda ótýi josparlanǵan Túrkitildes memleketter yntymaqtastyǵy keńesiniń (TMYK) 6-shy Sammıtine daıyndyq jumystary aıasynda, Qazaqstan Syrtqy ister mınıstri Qaırat Ábdirahmanov Túrkitildes memleketterdiń Parlamenttik Assambleıasynyń (TúrkPA) Bas hatshysy Altynbek Mamaıýsýpovpen jáne Halyqaralyq Túrki akademııasynyń prezıdenti Darhan Qydyrálimen kezdesý ótkizdi.

«Qazaqstan Prezıdenti Nursultan Nazarbaev damýdyń jańa kezeńine shyqqan túrkitildes yntymaqtastyq máselelerine erekshe mán beredi. TúrkPA - túrkitildes elder ıntegratsııasynyń negizi bolyp tabylady jáne sońǵy jyldary túrkitildes elderdiń parlamentaralyq dıplomatııasynyń halyqaralyq deńgeıde tanylǵan ınstıtýty boldy», - dedi kezdesý barysynda Q. Ábdirahmanov.

Mınıstrdiń aıtýy boıynsha, BUU, Eýropa Keńesi Parlamenttik Assambleıasy, EQYU Parlamenttik Assambleıasy sııaqty halyqaralyq uıymdarmen TúrkPA yntymaqtastyq ornatý qajet.

A.Mamaıýsýpov TúrkPA-nyń jumysy jaıly jáne uıymnyń 10-jyldyǵyn atap ótý jospary týraly habarlady. Atap aıtqanda, TúrkPA basshysy ústimizdegi jyldyń kúzinde Túrkııada ótetin Assambleıanyń kelesi mereıtoılyq Plenarlyq sessııasyna daıyndyq is-sharalary júrgizilip jatqany týraly aıtty.

«Túrki ıntegratsııasyn ilgeriletýge yqpal etý maqsatynda Uıymnyń Hatshylyǵy TúrkPA-ǵa múshe elderdiń zańnamalaryn bir qalyqpa keltirý boıynsha belsendi túrde jumys atqarýda. Qazaqstan - bizdiń halyqtarymyzdy jaqyndastyrý ıdeıasyn nasıhattaýdyń bastamashysy jáne osy turǵyda Astana túrki áleminiń maqtanyshy ekeni aıqyn», - dedi TúrkPA-nyń Bas hatshysy.

Halyqaralyq Túrki Akademııasynyń Prezıdentimen kezdesý barysynda túrkitaný jáne jalpy túrki tarıhyndaǵy zertteýlerdi odan ári keńeıtý máseleleri talqylandy. Sonymen qatar, Akademııanyń ınstıtýtsıonaldaý protsesin múmkindiginshe qysqa merzimde aıaqtaý qajettiligi atap ótildi.

D. Qydyráli Syrtqy ister mınıstrligine Akademııanyń qalyptasý protsesinde zor qoldaý kórsetip otyrǵany úshin alǵysyn bildire otyryp, Instıtýt TMYK 6-shi Sammıtin ótkizýge laıyqty úlesin qosýǵa jáne ǵylymı-zertteý salasynda túrkitildes memleketter arasyndaǵy yntymaqtastyqty damytýdy jalǵastyrýǵa daıyn ekenindigin bildirdi.