Qaırat Ábdirahmanov Túrki akademııasyna syrtqy saıası qyzmeti týraly kitaptardy syıǵa tartty
2010 jyly Elbasynyń bastamasymen qurylǵan Túrki akademııasy osy jyly óziniń 8 jyldyq mereıtoıyn ótkizdi.
«Qysqa merzim ishinde akademııa úlken jumys ótkizip, Túrkitildes memleketter yntymaqtastyǵy keńesiniń (Túrki keńesi) múshe-memleketteri - Ázerbaıjan, Qazaqstan, Qyrǵyzstan jáne Túrkııa arasynda mádenı-tarıhı jáne ǵylymı-zertteý yntymaqtastyǵyn damytýǵa qomaqty úles qosty. Akademııa qazirgi kúni ıntellektýaldy uıymǵa aınaldy», - dedi Qaırat Ábdirahmanov.
Mınıstr ǵylymı uıymnyń qabyrǵasynda ázirlengen Túrki ıntegratsııasynyń tujyrymdamasy Túrki keńesiniń josparlanǵan 6-shy sammıtinde qabyldanatyn mańyzdy qujattardyń biri bolatyndyǵyn erekshe atap ótti. Túrki keńesine múshe taraptarmen Túrki akademııasynyń ınstıtýtsııalandyrý rásimin aıaqtaý boıynsha jáne túrki mádenı-gýmanıtarlyq yntymaqtastyqty jańa deńgeıge shyǵarý boıynsha tıisti jumys júrgizilýde.
Túrki akademııasynyń prezıdenti Darhan Qydyráli halyqaralyq deńgeıdegi ǵylymı uıymnyń qalyptasýyna qolǵabys kórsetip kele jatqan Memleket basshysy N. Nazarbaevqa jáne Syrtqy ister mınıstrligine alǵysyn bildire otyryp, túrki memleketterdiń arasyndaǵy yntymaqtastyqty ilgeriletý jolynda akademııanyń ujymy bar kúshin salatyndyǵyna óziniń tereń sendirýlerin bildirdi.
«Akademııa Túrki áleminiń murasyn zertteý boıynsha úlken ǵylymı-zertteý jumys ótkizýde. Biz «Ortaq túrki tarıhy» oqýlyǵyn ázirleý boıynsha jumysty bitirip, XV ǵasyrǵa deıingi «Ortaq túrki ádebıeti» men «Ortaq túrki geografııasy» oqýlyqtarynyń jobalaryn daıyndaý jumystaryn jalǵastyrýdamyz. Sonymen qatar, akademııanyń qyzmetkerleri «Atalar mırasy» jáne «Túrkbarometr» atty eki jobany daıyndaýda», - dedi D.Qydyráli.
Akademııada Túrki áleminiń eksponattary ornalasqan murajaıy jáne túrkologııa men onyń mádenı murasyna arnalǵan 50 myńnan astam kitap jınalǵan kitaphana qory bar.
Q.Ábdirahmanov akademııanyń qyzmetkerlerin ǵylymı-zertteý saladaǵy halyqaralyq bastamalardy ilgeriletý jáne túrki yntymaqtastyqty damytý boıynsha qosqan úlesteri úshin qurmet gramotalarymen marapattap, sonymen birge Túrki akademııasy qoryna Memleket basshysynyń jáne Syrtqy ister mınıstrliginiń syrtqy saıası qyzmeti týraly kitaptardy syıǵa tartty.