Qaırat Ábdirahmanov Nıý-Iorkte ekijaqty birneshe kezdesý ótkizdi
Atap aıtqanda, qazaqstandyq syrtqy saıasat vedomstvosynyń basshysy Reseı, Qyrǵyzstan, Tájikstan men Kýveıt elderindegi óz áriptesterimen, sondaı-aq BUU Bas hatshysymen kezdesti.
Reseıdiń Syrtqy ister mınıstri Sergeı Lavrovpen kezdesýde áriptester dostyq mándegi dástúrli qalypta ekijaqty qarym-qatynastyń damýyn talqylap, jahandyq jáne aımaqtyq máselelerge baılanysty pikirlerimen bólisti. Kezdesý barysynda BUU Qaýipsizdik Keńesiniń kún tártibindegi máseleler aıtylyp, atalǵan suraqtarǵa baılanysty Astana men Máskeýdiń ustanymynyń jaqyndyǵy dáleldene tústi. Qaırat Ábdirahmanov 2017 jyl boıy Astananyń BUU Qaýipsizdik Keńesi quramyndaǵy jumysyna qoldaý bildirgeni úshin reseılik áriptesine alǵys bildirdi. Óz kezeginde Sergeı Lavrov Qazaqstannyń Qaýipsizdik Keńesindegi tóraǵalyq qyzmetine joǵary baǵa berdi.
Qyrǵyzstannyń Syrtqy ister mınıstri Erlan Abdyldaevpen bolǵan kezdesýde Qazaqstannyń syrtqy saıasat vedomstvosynyń basshysy aımaqtyq jáne jan-jaqty máselelerdi talqylap, ekijaqty yntymaqtastyqtyń ózekti máselelerin, sonyń ishinde Qyrǵyzstan Prezıdenti Sooronbaı Jeenbekovtyń ótken jyldyń sońynda Astanaǵa resmı sapary barysynda qol jetkizilgen kelisimderdiń iske asyrylýyn qaýzady.
Qaırat Ábdirahmanov Tájikstannyń syrtqy ister mınıstri Sırodjıd Aslovpen Astana me Dýshanbeniń aımaqtyq jáne ekijaqty yntymaqtastyǵyn talqylady. Tájik dıplomaty Qazaqstannyń Qaýipsizdik Keńesindegi birinshi ret tóraǵalyq etýine jáne Aýǵanstan men Ortalyq Azııadaǵy qaýipsizdik máselelerine baılanysty debattyń shaqyrylýyna joǵary baǵa berdi.
Qazaqstannyń Syrtqy ister mınıstri sonymen birge Kýveıt Memleketiniń syrtqy ister mınıstri - Premer-mınıstrdiń orynbasary Sheıh Sabah ál-Haled As-Sabahpen kezdesý ótkizdi. Kezdesý barysynda taraptar ekijaqty yntymaqtastyqty damytý joldarymen qatar, ortaq múdde turǵysynda birqatar halyqaralyq máseleler boıynsha pikir almasty. Qaırat Ábdirahmanov BUU aıasynda birsypyra halyqaralyq jobalardyń bastamashysy bolyp júrgen Kýveıttiń belsendi rólin erekshe atap ótip, Qaýipsizdik Keńesindegi turaqty emes múshe retinde bul eldiń jahandyq qaýipsizdikti nyǵaıtýda óz úlesin qosatynyna senim bildirdi.
19 qańtar kúni Qazaqstan SІM basshysy dástúrli túrde aı saıyn ótetin BUU Bas hatshysy Antonıý Gýterrıshtiń Qaýipsizdik Keńesine turaqty múshe-memleketterdiń ókilderimen kezdesýine qatysty. Qaırat Ábdirahmanov qatysýshylardy Sırııa máselesi boıynsha Astana protsesiniń jumys barysymen tanystyrdy. Qazaqstandyq dıplomat óz sózinde Astana alańy Sırııadaǵy qarýly qaqtyǵysty toqtatýǵa aıtarlyqtaı úles qosyp, BUU urany boıynsha Jenevadaǵy kelissóz protsesine qosymsha dem berip otyrǵanyn atap ótti. Kezdesýge qatysýshylar sonymen birge, Kolýmbııadaǵy ahýaldy, sondaı-aq BUU bitimgerlik mıssııasynyń qaýipsizdigin qamtamasyz etýdiń mańyzdy sharttaryn talqylady.