Qaırat Ábdirahmanov Qazaqstan men Reseıdiń máńgilik dostyǵy týraly aıtty

MÁSKEÝ. QazAqparat - 2018 jyldyń 6 shildesinde Qazaqstan Respýblıkasy men Reseı Federatsııasy arasyndaǵy HHІ ǵasyrǵa baǵdarlanǵan máńgilik dostyq pen odaqtastyq týraly Deklaratsııanyń qabyldanǵanyna týra 20 jyl tolady. Bul data múmkindikter men basymdyqtarǵa, strategııalyq yntymaqtastyq rýhynda memleketaralyq qarym-qatynastyń kezeń-kezeńmen damýyna den qoıǵan bizdiń memleketterimizdiń arasyndaǵy yntymaqtastyqtyń bekemdeýine bir oı júgirtýge taptyrmas sebep bolyp otyrǵany aıqyn. Bul týraly «Rossııskaıa gazeta» basylymynda jarııalanǵan maqalasynda Qazaqstan Respýblıkasynyń Syrtqy ister mınıstri Qaırat Ábdirahmanov aıtty, dep habarlaıdy QazAqparat.

«Dál osy Deklaratsııa qabyldanǵan kezde ol qujattyń postkeńestik elder ishinde balamasy joq bolatyn. Ol qujatta Qazaqstan men Reseı halyqtarynyń kórshilik ári dostyq qarym-qatynasynyń joǵary deńgeıi ǵana emes, jańa myńjyldyqtaǵy eki eldiń tabysty qarym-qatynasynyń sátti ári kópjosparly damý parametrleri men jańa qaǵıdattary belgilengen edi. Qujat osynysymen qundy. Osy qujatqa qol qoıa otyryp, Qazaqstan men Reseılik kóshbasshylary eki memleket arasyndaǵy qarym-qatynastyń damýynyń jańa kezeńderin ashty», - deıdi Qaırat Ábdirahmanov.

Syrtqy ister mınıstriniń aıtýyna qaraǵanda, Qazaqstan Prezıdenti Nursultan Nazarbaevtyń «Turaqty damý arqyly Táýelsizdikti nyǵaıtý» atty («Kazahstanskaıa pravda» gazeti, 1995 jyldyń 16 jeltoqsany) maqalasynda: «Bári de túsingenin qalaımyn: Qazaqstannyń egemendigi moıyndamaýdy emes, kerisinshe qazaqstandyq-reseılik baılanysty ómirdiń barlyq salasynda damytý ári bekitýdi kózdeıdi. Ekonomıkalyq, saıası jáne áskerı saladaǵy bizdiń ózara táýeldiliktiń ózin jasyrý aqymaqtyq bolar edi. Tipti onymen kúresýdiń ózi de retsiz. Bizdiń mindet - eki eldiń ortaq múddelerin kelisimdi-quqyqtyq bazaǵa sáıkestendirip, ony júzege asyrýdyń tıimdi mehanızmin qurý bolyp tabylady» delingen.

Mine, osy mindetterdi oryndaý maqsatynda Deklaratsııa qabyldanyp, Táýelsizdik alǵan jyldardan beri osy jolmen kele jatyrmyz.

«Keńes odaǵy qulaǵan kezeńde memlekettik basqarý negizin qurý, ultaralyq turaqtylyqty saqtaý, ekonomıkalyq damýdyń múlde jańa standarttaryna aýysý sekildi ózekti máselelermen birge, kórshiles eldermen ózara tıimdi qarym-qatynasty retteý máselesi de turǵany esimizde. Іshki odaqtyq baılanystardyń irgesi qalaı sógilgenin kózimizben kórdik. Ulttyq respýblıkalardaǵy onsyz da máz emes jaǵdaılardy bul másele ekonomıkalyq daǵdarys pen ultaralyq arazdyqty týyndatýmen birge tipti de ýshyqtyryp jibergen bolatyn.

Qazaqstan úshin Reseımen baılanystardy úzý qolaısyz ári logıkaǵa qaıshy boldy. Sebebi, Qazaqstan men Reseıdiń berik ári tatý kórshilik yntymaqtastyǵynyń negizi tarıhı, mádenı, geosaıası ári geoekonomıkalyq faktorlarda jatqan edi. Osy jaılar eki el arasyndaǵy qarym-qatynasty jańa deńgeıge shyǵardy», - deıdi Qazaqstannyń Syrtqy ister mınıstri.

Reseı Qazaqstanmen osynaý strategııalyq mańyzdy qujatqa qol qoıǵan birinshi memleket bolatyn.

Tolyǵymen yntymaqtasýdyń qýatty ımpýlsy Qazaqstan Prezıdenti Nursultan Nazarbaevtyń 1994 jyly Reseıge jasaǵan resmı issapary kezinde anyq baıqaldy. Dál sol sapar barysynda saýda-ekonomıkalyq, ǵylymı-tehnıkalyq jáne gýmanıtarlyq salada, sonymen birge Baıqońyr ǵarysh aılaǵyn paıdalaný sharttary týrasynda taraptar kelisimge kelgen bolatyn.